Dawa hiar shuki ka NPP ia u Mukul bad ka Kong Roshan

Shillong, 21 Jymmang:
Ka National People’s Party (NPP) ka la dawa ba u Mytri Rangbah ka jylla Mukul Sangma bad ka myntri kam pohiing ka jylla ka Kong Roshan Warjri halor ka jingkhlad kyndit jong uwei u samla uba don ha kti ki pulit ha Tura uba shah kynnoh donkti ha ka jingpynshi tom ia ki 12 ngut ki samla kynthei.
Ka NPP ka la dawa ruh ba dei ban weng noh ia u SP ka West Garo hills u Mukesh Singh halor ka jingkynnoh ba u donkti ha ka jingkhlad noh u Balson Marak.
U nongkren ka NPP u James K Sangma u la ong ba u myntri rangbah bad ka myntri pohiing ka jylla ki dei ban shim ia ka jingkitkhlieh halor ka jingjia bad ki dei ban hiar shuki noh.
U Balsan Marak u la khlad ha Tura Civil hospital katba u dang don ha ka jingset phatok ha kane ka sngi Hatmajai.
U Sangma u la ong ha kane ka sngi Balang, “ngi dawa ba dei ban weng noh ia u SP ka West Garo Hills namar ka jingdonkti jongu halor ka jingkhlad jong u Balsan Marak”,. U la pynrem jur ba ha jaka ban iada ia ki paidbah, ki pulit ki la long pynban ki nongpyniap briew.
U Balsan Marak ula shah kem bad saw ngut kiwei pat halor ka jingkynnoh ba u donkti ban pynshitom ia ki 12 ngut ki kynthei ha Tura.
Katkum ka jingong u Sangma, bun ki kes kiba jia ha Meghalaya bad kane ka dei namar ba ka jingbym ler ki tnad pulit
U Sangma u la kynnoh ba ka jingjia ka pyni ba u myntri rangbah um sngew khia ia ki paidbah jylla bad u dei ban hiar shuki. Ka NPP ka la dawa ba dei ban buria ia ka jingkhlad noh une u samla.