“Kiei ki Niut?”

AIS Suja

Ki Niut ki dei kiei kiei kiba u briew u donkam shuh ia ki, ia kiba dei ban
kyntait sharud ne kino kino ki bynta ba long niut. Ki niut ki la don beit ha kano kano ka bynta ka jingim u briew (waste disposal).

U Jisu hangne u kren shaphang ka pharshi ki niut, da kaba ong – “Kita ki niut ki long ki khun uta u bymman (soitan)” Mathaios 13:38. Bunsien ki niut ki phlang ki ju ia mih lang ha lyngkha ne kper, shisien ba la thung ia u kba u kew ne jhur, bad kine ki phlang khlaw ki long ki niut kiba ia mih lang ban kjap ne pynjah ia uta u jingthung ba la ri la sumar bha. Don kaba u mih hi bad don pat ba bet symbai u nongshun nongdusmon kum ki symbai shiah bad kiwei.
Halor kane ka pharshi ki niut, u Jisu u ong – Yn tharai ba ka Hima ki bneng ka long kum uta u briew uba bet ia u symbai babha ha ka lyngkha jong u, hynrei u nongshun u la wan bet ia ki niut hapdeng u kew, te u la leit noh, haba la mih speh u kew bad u la sei soh, la sdang paw kita ki niut. Hadien katto katne ki shakri ki la kylli ia u kynrad, ko Kynrad mem shym la bet symbai babha ha ka lyngkha jong me? Peit nangno te la mih kum kine ki niut? U Kynrad u la ong, oh u briew uba shun uba leh ia kane. Ki shakri te ki ong – long ban thiew (phut) noh ia ki? U kynrad u ong – em. Wat thiew ioh haba phi thiew ia ki niut, phi rat lem ia u kew ruh” namar kata, ieh ia ki baroh ar ba kin iamih ia san lem haduh ka aiom ot, te ynda la poi ka aiom ot, ngan ong ia kiba ot – To lum shwa ia ki niut, teh song ia ki bad thang ia ki; hynrei ia u kew to ialum ha ka thiar jong nga” Mathaios 13:24-30.
Hangne, u Jisu um shah ban thiew ia ki niut hapdeng u kew. Ka mut ba um shah ba u para briew da u briew ban ia bishar ban ot ne weng noh ia u na ka kynhun ne na kano kano ka bynta ka ba don ha la lyngkha u Trai, ym dei ban leh stad ban thiew ne weng noh ioh ba ngi kum weng wat ia u kew de. Hynrei ka poi ka por ban pynsaphret ia u kew na u niut ia u niut na u kew. Ka mut, ieh hangto wat ktah ne leh stad da maphi, namar ka aiom ot kan sa poi hi, hangta yn pyniakhlad ia u niut na u kew kein. Namar, kam dei ia phi ki shakri ban leh stad ban leit thiew ia u niut napdeng u kew.
Ha kawei ka sngi, ki synran u Jisu ki la ong – To batai ia ngi shaphang ka pharshi ki niut ka lyngkha. Te u Jisu u la sdang batai kein, u ong – Uta uba bet ia u symbai babha u long u khun u briew (u Jisu), kata ka lyngkha ka dei kane ka pyrthei. Ki symbai babha ki long ki khun ka Hima (Hima u Blei), kita ki niut ki long ki khun u bymman (khun soitan), uta u nongshun uba bet u dei u soitan, kata ka aiom ot, dei kaba wai noh kane ka pyrthei, kita ki nongot ki dei ki angel. Kaba lum ia ki niut bad thang ha ka ding, kan long kumta kein, kata kaba wai noh kane ka pyrthei.
U khun u briew (Jisu) un phah ia ki angel ban leit sha kita kiba leh bymman ban bret ia ki ha ka lawarding ba kan long kaba lynniar bad kum dait bniat.
U Jisu u ong – ieh ia ki haduh kata ka aiom ot kaba wai noh kane ka pyrthei. Kane ka thew ia ki riew bymman, ki ba long ki niut, ki riew bymman kiba leh kam bymman kam awria babun phew spah jait ki bym poi shuh sha ka jingkylla kaba mut.
Ngi tip ba ka Bible ka iathuh ia kata ka por kaba wai noh ka pyrthei. Kaba wai noh ka pyrthei ka long hadien ki 1000 snem ka jingsynshar u Khrist. Hadien ka 1000 snem kein kan long ka aiom ot kaba wai noh ka pyrthei. Namar ka 1000 snem kan long ka por ka jingsynshar u Jisu Khrist hangne hi ha pyrthei lem bad kita kiba la siewspah kiba dangim bad kiba mihpat ha ka jingmihpat kaba Nyngkong. Jingpynpaw 20:6. Hadien ka 1000 snem, yn pynim pat ia ki riew bymman (ki niut) kiba dangim ruh ha kata ka por. Hadien ka 1000 snem, kan don ka jingbishar kaba khadduh ha kata ka khet Balieh bakhraw (Great White Throne) Jingpynpaw 20:11-15, kaba ong – “Bad nga la iohi ia kiba iap, kiba rit kiba khraw ki da ieng ha khmat kata ka khet (Throne) ……. te la bishar ia kiba iap na kita kiei kiei ruh ba la thoh ha ka Kitab, katkum ki jingleh jong ki. Ia ka jingiap bad ka Hedes labret sha ka pung ka ding kaba long kajingiap kaba AR. Te jar u bym la shem ba la thoh ha kata ka Kitab KA JINGIM, yn bret ia u sha ka pung ka ding” Jingpynpaw 20: 12-15.
Ngi tip ba hadien ka 1000 snem, bad hadien ka jingbishar bakhadduh ha kata ka khet bishar Balieh Bakhraw, u Blei un hukum ban bret sha ka pung ka ding bad ksuid bad soitan bad riewbymman (kiba long Niut). Bad hadien kane kan poi kaba kut kaba wai noh ka pyrthei bad yn ym don pyrthei shuh da kawei pat.
“Ynda kumta, long KABA KUT ynda u Jisu un aiti noh ia ka Hima ha u Blei uba u Kpa, ynda la pyndam noh IA KA JINGSYNSHAR baroh bad ia ka JING DONBOR BAD IA KA BOR BAROH” 1 Korinth 15:4-28.
Dei hangne kein ka poi ka por kaba kut kaba wai noh ka pyrthei. Kumta kiba hok ki lah ban ioh bynta ha ka jingmihpat kaba Nyngkong. Jingpynpaw 20:6. Hynrei kiba khlem mihpat ha ka jingmihpat kaba Nyngkong, kin long kein kita ki niut kiba sah hapoh khyndew sa 1000 snem ha ka por jingsynshar u Jisu Khrist. Hadien ka 1000 snem kin mihpat ha ka jingmihpat kaba khlem burom, “Ka jingmihpat sha ka jinglehrain bad jingjah burom bymjukut” Daniel 12:2.
Kine kein dei kita “ki niut” ba dei ban bret ia ki sha ka dujok ding bymjulip. Hynrei kiba hok kin leit noh sha bneng kiba long kita kein ki kew.
U Jisu un lum ia ki ha kata ka iing ha bneng, sha kaba ka khmat kam pat iohi, ka shkor kam shym la iohsngew, bad kim shym la mih hi ruh ha ka dohnud u briew, kita kein, ki long kiei kiei ia kiba u Blei U LA BUH LYPA IA KITA KIBA IEIT IA U” 1Korinth 2:9. Amen.