Leit khang ka HYC ia ki Bank, kiba trei kam ha ka sngi rakhe Behdeinkhlam ka Tuber

Shillong: Ka Hynñiewtrep Youth Council War Jaiñtia Circle ryngkat ka HYC Amlarem unit, mynta ka sngi hapoh ka jingialam u Sport Secretary, u samla Bonanza Shylla, ki la leit sha ka tnad Amlarem ka state Bank ka Ri India bad ka tnad ka Apex bank halor ka jingbym kheiñkor jong ki bor ba halor ba kim shym la bthah ia ki tnad Bank ban ai shuti kum mynta ka sngi kyrpang ka Ri Jaiñtia Pnar baroh kawei, kaba dei ka sngi jong ka jinglehniam ka Tuber Behdienkhlam.

Shuh shuh ki dkhot ka seng, ki la shim da ka sienjam ban khang khyrdep ia ka Amlarem State Bank of india bad ia ka Apex bank kaba don ha katei hi ka shnong.

Haba la wad jingtip bniah da u nonglum jingtip khubor ka HYC War Jaintia Circle hapoh ka jingialam u Vice President u Rangbah Jembis Khongiong bad u Publicity ka seng, ki la leit sha Nongtalang Meghalaya Rural Bank. Ha ka jingiakren, ka Manager bank, ka la iathuh ma ki kim nud ban shu khang ia ka Bank khlem ka jingioh order na ki bor ba halor. Te halor kane ka nongrim la khang khyrdep ia ka Bank.