Ka Assam bad ki sawdong pud jongka

Ka Assam, ka don ha ka jing ia kajia pud bad baroh ki Jylla jong ka thain shatei lam mihngi bad lada iakren ia katei ka mat, ngim dei ban kynnoh ia ka Assam, hynrei ka dei ka jingleh bym salia jong ka sorkar India, namar ba ka pynioh Jylla, ia ki Jylla ba bun jong kane ka thain, khlem da pynbeit lypa ia u pud u sam.

Mynta ka Assam, ka sdang ban kam trai biang ia kiba bun ki jaka puta, kiba la dei ban hap sha kito ki jylla, kiba la dep phiah ha ki phew snem mynshwa bad kitei ki kynthup kum ka Mizoram, ka Nagaland, Meghalaya, Arunachal Pradesh bad sa kiwei de; hynrei ka Assam, ka dei ban sngewthuh ba kam dei ma ka, ka ban tuklar ia u pud u sam jong kitei ki Jylla, namar ba ma ka ruh, ka dei tang kawei ka Jylla, kaba la shah pharia ha ki phew snem mynshwa bad kam dei pat ma ka, kaba don bynta ha kaba bate ia u pud u sam bad ka dei ka kamram jong ka sorkar India, ha kito ki phew snem mynshwa ba kim shym leh eiei.
Kumba la iakren na ka por sha ka por, ngi hap ban sngewthuh ba ha shwa jong ka jingphiah ia ki jylla ha ka thain shatei lam mihngi, ngi tip ba ki jaitbynriew Mizo, lada dei ba ki don hajan Guwahati ruh, ki dei hi ki Mizo bad kitei ki iadei ia ki kam ki duk jongki bad ki para Mizo bad kumjuh ia ki Khasi, lada ki don ha Jorabat, kaba la shim ba ka dei ka jaka jong ka Meghalaya bad kitei hi kin kam trai ia ka Shillong, ban ia ka Guwahati bad halor kitei ki jingshisha, ka sorkar India ruh ngi shim ba haduh ha kine ki sngi, ka ithuh ba ki Khasi, ki dei hi khasi, wat la ki don ha Assam bad ki Mizo ruh kumjuh bad halor katei ka phang, ngi dei ban shai bha, ba jing ia kam pud, kam dei satia ban pynheh jubor ia kano kano ka Jylla, hynrei ka dei ban ia wan, katba kum ka jinglong jingman jong ki briew bad ka synshar khadar kaba pynsuk ia ki.
Namarkata, na ka bynta ban wan rah ia ka jing ia beit kaba shi junom, ka donkam ia baroh ka Jylla jong ka thain shatei lam mihngi, ba kin iakren sha ka sorkar India, kaba pynioh Jylla ia ki, ba kan pynbeit ia u pud u sam, halor ka nongrim ba ka pynioh Jylla ruh kumjuh lane lehse, kumba don ba ong ia ka Meghalaya, ka Jylla rilum bad kumta ki riewlum ki dei ban long trai ia katei ka Jylla.