Da ki hajar mih wanrah ‘Dein Bhang’ ha ka Behdeinkhlam Tuber

Jowai: Myn hynnin ka sngi kaba dei ka sngi balai ka Lehniam Behdeinkhlam ka Sein Raij Tuber, da ki hajar ngut ki paid riewngeit Niamtre ki la mih na ki shnong bapher bapher ban leit rah ia ki ar tylli ki ‘Dieng lane Dein Bhang’ kiba dei ki dieng kyntang ha ka lehniam Behdeinkhlam ha Tuber Kmai shnong ka ban sa kut noh lashai ka sngi Lah U Blei.

Ki khon ka Sein Raij Tuber naduh ki Rangbah, ki samla kynthei bad Shynrang, ki longkmie bad ki khynnah rit ki la iamih nala ki shnong ki thaw ban hiar sha ki ar jaka ban wanrah ia kitei ki Dieng Blei sha Pung Biar Blai ha Tuberkmai Shnong.
Ka kynhun phangwah ka la hiar shaduh ka Shnong Lumshyrmit kaba jngai kumba 15-16 Km na shnong Tuber ban leit rah ia uwei na ki Dieng Bhang katba ka Phangnein ka la hiar sha jan ka Shnong Rashai bad wanrah ia uwei pat u Dieng Bhang lane Dieng Blei.
Ha kane ka jingleit rah Dieng Phang ki riewngeit ka Niamtre jong ka Sein Raij Tuber ki la iaid lynti lynti ha ryngkat ki jingsawa ki bom ki ksing bad ki jingriew ki Tangburi ki iashad ban risa kynoi.
Kane ka lehniam kan kut mynta ka sngi lah U Blei ha Pung Biar Blai kaba don ha Tuberkmai Shnong ha kaba u Myntri Rangbah ka Jylla u Conrad Sangma ha ryngkat ki katto katne ki kynhun myntri jong u, ki MLA, MDCs bad ki Sahep sorkar kin wan ban sakhi ia kane ka lehniam shad Behdeinkhlam ba shisien shisnem jong ka raid ka muluk.
Ka Behdeinkhlam kadei ka lehniam ki Pnar kiba dang bat ia ka niamtre niamtynrai bad la ngeit ba lyngba kane ka lehniam ki khun ki raiot kin lait na ka khlam ka dait bad ruh ban bha ka rep ka riang ban lait na kino kino ki jingsniew ha ka imlang ka sahlang la kadei ka bor mariang lane ki jingsniew ba thaw hi u briew naduh ka kyiad u drugs bad kiwei kiwei ki kam bymman.