“U paidlang, u jot, namar bym don jingtip!”

AIS Suja

“Ia u paidlang jong nga la pynjot, namar bym don jingtip” kane ka long ka kyntien ba la mih na u Blei ha ka por u Hosia Nongiathuhlypa. U Hosia u la long u nongiathuhlypa ha ki bynta shatei jongka Hima Israel hyndai kumba 50 snem ei ei, bad u la long u Prophet ha ka por ka jingsynshar jong u Syiem Jeroboam uba ar.

Ha kata ka por, u Blei u la jied ia u Hosia ban iathuhlypa ia kaei ka ban jia ha Israel, namar la pyndap ia ka Ri da ka pop bad ym don jingshisha lane jingisynei, lane ym don ka jingtip ia u Blei ha ka Ri. Ha ka Ri don tang kaba smai, kaba thok, shukor, kaba pyniap, kaba tuh, kaba klim, bad kiba ka snam ka kynroi ia ka snam. Namar kata ka Ri ka iam briew, uba shong ha ka un sdot noh. Ia ki mrad khlaw, ki sim bneng bad ki dohkha ka duriaw yn shim noh. Hosia 4:1-3.

“Ia u paidlang jong nga la pynjot, namar bym don jingtip” Hosia 4:6. La pynjot ia u paidlang jong u Blei kumta u Blei u la phah ia u Prophet Hosia ban leit pynbna ban leit maham ia ka daw ka jingjot ha Israel. Ka jingkyntait jong ki ia ki hukum u Blei, ka la pyllong ia ki ban jot noh bad ki la im ka jingim ka bym tip briew tip Blei, ka jingshisha ka la duh noh ha Israel, la dap tang ka smai lamler ka shukor ka thok kaba tuh kaba pyniap, kaba pynmih snam ia u para briew, dei na kata ka daw ka Ri ka dap da ka jingiam briew bad ring sdot noh. Ym don shuh kaba burom ym don shuh ka jingtip, baroh ki la kyntait ia ka jingtip ia ka ktien u Blei dei hangta ba u Blei u la ong – Namar me (Israel) la kyntait ia ka jingtip, Nga ruh ngan kyntait ia me ba men ym ioh long Lyngdoh ha nga” Hosia 4:6.

U Blei u dap da ka jingieit ia ki Israel, hynrei dei ka jingkyntait bad jingbymkohnguh jong ki hi ba u Blei u la pynduh noh ia ki ban ioh long Lyngdoh (Priest) ha ka Hima Israel. Kumta na ka daw ba ki Israel ki la klet ia ka Hukum u Blei u Blei ruh u la klet noh ia ki khun ki pateng jong ka jaid bynriew Israel. Ka jingkyntait ki Israel ia ki Hukum u Blei, ka la pyllong ia ki ban duh noh ia ka kabu ban long Nongsynshar ban long Lyngdoh (Priest) ki jong u Blei halor ki briew baroh.
Kaei kaba mih nangne? Ka long ka jingjot kein, kat haduh ba ki Israel ki la duh syndon ban long Lyngdoh (Priest). La pynsakma kylleng ia ki, la synshar halor jong ki da kiba bun ki Syiem bad ki Hima pyrthei bad khadduh ki Israel ki la long tang ki mraw (Slaves) ha la ka Ri.
Ki Israel kim shym lah ban long kata ka Hima Lyngdoh (Kingdom of Priest) namar ki tang shu lait na Ri Egypt na ki kti u Syiem Pharoah, ki la phai lyndet ia u Blei. Exodus 32:1-6. Kumta u Blei u la buh artylli ki kyndon halor ki Israel ynda ki la poi ha ri kanaan, kata ki jingkyrkhu (Blessing) bad ka jingtim (Cursing). Hynrei ngi iohi ba ki Israel ki la jied ia ka jingtim (Cursing).
Kumta ki Israel ki la long mraw haduh 111 (shispah khadwei) snem. Ki Israel ki la kyntait ia u Blei ha ka por u Samuel, bad ki la pan Syiem ban synshar halor jong ki. 1 Samuel 8:1-5. Bad u Syiem uba Nyngkong ba ki la ioh u dei u Syiem Saul 1050 BC. Hynrei kata ka jinglong Syiem kam neh ka Hima ruh kam neh. Ka Israel ka la ioh haduh 20 ngut ki Syiem. 2 Syiem 17:3-41.
Ha kane ka rukom, ki Israel ki jot noh namar bym don jingtip bad ba ki kyntait ia u Blei. Hosia 4:6. Ha kane ka rukom ki Israel ki la nang roi bad ki la nangleh pop shuh. ong u Blei – “Ngan pynkylla ia ka burom jong ki sha ka JINGLEHRAIN” Hosia 4:7.
Kane kajuh ka khubor ka dang im bad ka kren mynta ha ngi ha ka Ri bad ka jaid bynriew namar ka ktien ba u Blei u kren. Ba lada ka Ri bad ka jaid bynriew ka jot noh dei namar ba ki briew bad ki Nongsynshar ki la kyntait ia ki jingshisha baroh, namar ba ki la kyntait ia ka jingtip ia ka ktien u Blei. Namar u Blei u kren shai da kaba ong – Lada phi kyntait ia ka jingtip (ki ain Blei) Nga ruh ngan kyntait ia phi, na ka daw ba phi la klet ia ki Hukum u Blei jong phi, nga ruh ngan klet ia ki khun (pateng) jong phi. Kane ka long kaba shyrkhei namar u Blei u bitar, ba lada ki briew ki kyntait ia ka jingshisha ka ktien u Blei, ka Ri ka jot noh namar u Blei u la buh ma u ia kiei kiei baroh na ka bynta u briew, wat haduh ki kam synshar khaddar da kaba bam smai ha khmat u Blei (sworn before God) ban leh ia ka hok ha ka synshar khaddar, namar dei u Blei ba la buh ia kine kiei kiei. “U pynkylla ma u ia ki por bad ia ki aiom, u pynduh ia ki Syiem, bad u thung ia ki Syiem, u ai ka jingstad ia kiba stad, ka jingtip ia kiba don jingshemphang” Daniel 2:21-22.
Namarkata, donkam ban tip bad kohnguh ia ka ktien u Blei namar ba ka long ka ain u Blei ha la marwei, ne ha ka Ri, ka jaid bynriew baroh, khnang ba ka Ri ka ym jot noh.
Ka Israel mynwei ka jot noh dei namar ba ka la kyntait ia ki jingshisha, bad u Blei ruh u kyntait ia ki. Te wat shah ba ka jaid bynriew jong ngi kan kyntait ia u Blei, namar lada kyntait, ka jingtim (cursing) ka wan. Ynda haba u Bei un klet ia ka Ri bad ka jaid bynriew jong ngi kumba la jia ha Israel hyndai.
Dei halor ka nongrim ka jingkyntait ia u Blei ia ki ain jong u, wat mynta ruh bun ki briew ki jot noh, bun ki Ri ki Hima ki jot noh. Lada ka jingim ha pyrthei ym nang ban burom ia u Blei bad ia ka ktien jong u, ki jingeh ki wan, ki jingsynshar kim neh, ki nongsynshar kin bun ong ka ktien u Blei. Ka Hima Israel ka la ioh 20 ngut ki Syiem naduh 1050 B.C haduh 586 B.C, ka la don 20 ngut ki Syiem ba synshar halor jong ka, kaei kane? Ka daw ka long ba la pynjot ia ka hima na ka daw ka jingbym kohnguh ia uBlei. “Namar ki jingpalat ka Ri, kin long shibun ki Nongsynshar jong ka: hynrei da ki briew kiba shemphang bad kiba tip ia ka jinglong jong ka, yn pynslem” Proverb 28:2.
Kumta, ka jingbymtip ne pdiang ia ki ain ki Hukum Blei, ka jaid bynriew ka jot, u paidlang u jot noh namar bym don jingtip. Hosia 4:1-3. Kumta lada u briew un jngai na u Blei uta u briew un jot noh, ka jingim jong u kan kut noh ha ka jingsngewsih, ha ka jingjah burom. Dei ia kane kein ba u Blei u ong – ki briew jong nga ki jot noh namar bym don jingtip. My people are destroyed for they lack knowledge.