Ki la bam ei ki masi raikhoh, ia ka umsyep U bah Rana

Shillong: U Bah Rana Kharkongngor, uba dei uwei na ki nongrwai Khasi ba khrawnam jong kane ka juk, ula kren bitar jur, halor ka jingshim kabu jong ki briew, kiba pynmih ei ia ki jingrwai jongu, khlem ka jingioh jingmynjur satia na u, ha kaba ki la pynmih ha ka channel jong ka youtube ha kine ki sngi.
U bah Rana, haba iakren bad U Rupang, ula ong ba kawei ka channel masi raikhoh, kam ioh jingbit satia ban pynmih ia ki thup jingrwai jong utei u nongrwai bad katei ka dei kaba ki la shu leh tuh ia ka hok long trai, ong U bah Rana. Ha ki kyntien jong U bah Rana, ula ong “Ki la bam ei ki masi raikhoh ia ka umsyep U bah Rana”.
U Bah Rana, ula maham ia ki masi raikhoh, ba ynda ula lap, un sa aiti sha ki pulit ia kitei ki masi raikhoh. Utei u nongrwai, u ong shuh shuh ba ka jingtrei shitom jongu, kum u nongrwai, ka jing lut jong ka bor ka sor, ka pisa ka tyngka, na ka bynta ban pynmih ia kitei ki thup jingrwai bapher, hynrei mynta pat la shu bam ei, ki masi raikhoh da kaba suk.