Nongpoh: Ka Ri-Bhoi Tourism & Environment Development Forum, ha ka sien kaba ar, ka la rai ban pynlong biang ia ka tamasa Sohtrun ha Ri-Bhoi bad ka ban sa long ha madan NSCA Pahamsyiem ha ka 26 tarik mynta naduh ka por 9 baje mynstep.
Ha katei ka Tamasa, ka RBTEDF, kan sa iatreilang ha ryngkat ka Pine Apple Grover Society lem bad palat 20 tylli ki shnong kiba dei ruh ki shnong kiba khlain bha ha ka jingpynmih ia u Sohtrun.
U Bah Plielad Tiewsoh, Chairman ka RBTEDF, u la ong ba ha katei ka sngi kin don ruh shibun ki prokram naduh ka put ka tem, ka shad ka kmen bad kiwei kiwei ki jingpyn byrngia tynrai bad kan don ruh ka Housie bumper bad ki kynhun tem ba tbit ki ban pynshong shit ha katei ka sngi bad pynbud pat da ka DJ ha ka por janmiet.
U la ong ruh ka jingthmu jong ka RBTEDF ban pynlong ia katei ka tamasa ka long ban kyntiew ia ka kam rep sohtrun ha Ri-Bhoi District, kumba u Sohtrun u dei uwei na ki jait soh ba pawnam ba la pynmih na Ri-Bhoi District ba khlem dawai bad ban thawlad ruh ia ki paidbah naka bynta ban pyniaid iew ia u sohtrun.
Kumta na ka liang ka RBTEDF, ka khot bad wer ia ki paidbah ban wan sha katei ka tamasa bad ban mad ruh ia u sohtrun ba la pynmih na Ri-Bhoi District ha katei ka sngi.
Ngi kiba rep sohtrun ngi khuslai bha namar ngim lah ban pyniaid iew ia u sohtrun ba ngi don, katba ma phi phi mut ban ia wer shuh shuh ia ki wei ban ia rep ia u sohtrun lah jynjar phi, lah bun ki nongrep ia ki nong bam