KA THMA U KHADSAWPHRA

BOLDNESS L NONGUM 14-8

Ka 17 tarik u bnai Naitung ka dei ka sngi sah jingkynmaw ha kaba ha kane ka sngi U Khla Wait, U Tirot Sing jong ka Hima Nongkhlaw u la khlad noh ha ing Bindi ha Dhaka ha ka snem 1835. Ka Sorkar Meghalaya kala ai shuti ha kane ka sngi khnang ba ki khun ka Ri kin ioh ban Rakhe kynmaw ia U Tirot Sing. Ha kum kane ka sngi ryngkat bad ki wei ki kiwei ki kynhun, ka Hima Nongkhlaw ruh ka ju rakhe kyrpang ia kane ka sngi ha Mairang bad Nongkhlaw khnang ba ki khun ki hajar kin ioh iashimbynta lang. Te mynta ka snem ruh (2019) U syiem bad ka Dorbar ki khot sngewbha ia ki khun ki hajar ymtang jong ka Hima Nongkhlaw hynrei ia baroh ki ba shong ha ka Bri u Hynniewtrep ban ia rakhe lang ban pyni ia ka jingiatylli bad burom ia une u Khla Wait jong ngi.

Ha nga hi shimet, nga la don ka jingthmu ban thoh Article halor U Syiem Tirot tangba nga shem ba ka jrong than, kan pynngiah pynjlep ia ki nongpule te nga shu thoh da kane ka Poitri ba kin sa ia pyniar hi. Lyngba kane ka Poitri kiba bun kin ioh jingtip shuh shuh shaphang kaei kaba la jia ha kito ki por jong ka snem shuwa ka 1826 ter ter haduh 1835; hapoh ka thain Khadsawphra. Nga kyntu ia ki samla pule ba kin nang ia wad bniah shuh shuh halor kiei kiei kiba ia dei bad kane ka jingjia. Ia kane ka Poitri nga kyntu ia ki nongpule ba kin pule na sdang ha kut ym tang ban ioh jingtip hynrei ban sngewthuh ia ka jingmut jong ka.

Ka Thma U Khadsawphra

(Ka jingsdang)

1. U Tirot Sing Syiem Khadsawphra
   U lum u khot dorbar Hima
   ‘U Iskat Sahep kwah tih surok
   Pyni ka nia, pyni ka hok’.
2. Myntri jong u, ki kyrngah khlieh
   ‘Ym lah shaniah ia u dohlieh’.
   ‘Jingsuk hima ioh ka pynthut
   Da husiar ho!’ ong u Monbhut.
3. Iskat Sahep wanpoi hangta
   ‘Nongkhlaw surok kwahtih ma nga
   Ko Syiem bakhraw bad ki Myntri,
   Da shna lynti jingsuk ia phi.’
4. ‘Kamrup-Shilot kwah pom lynti
   Lyngba kane hima jong phi,’
   U ne u phan bad u Sohphoh
   Iadei hangne maphi thung noh.
5. ‘Lynti pynsuk jingim jong phi
   Kan kiew ka rep ka kam khaii.
   Lada mynjur mynta Dorbar
   Ngan pynphai noh ia ka Bordwar.’
6. ‘Wei kumta ka biang ko lok
   Ba phin sdang noh ka shna surok
   Juban lak phi tang bakla
   Kynmaw ia phi ym don jaka.’

1. Mar kumta Iskat Sahep
   U ai jingtip ban sdang dang step.
   Peit na u Syiem la ioh hukum
   Wut wut sdang noh nangthie narum.
   1. ‘Bourton, Buddingfield,’ u khot ia ki
      ‘Ki bha palat kine Khasi
      Tang tiak bakla ia ki nga tieng
      Long kumba iuh ia skum u Kyieng.’
   2. Kumta ka kam ka iaid shaid shaid
      Surok ka dep ba bun u paid
      Shipor ka I kumba jai-jai
      Hadien patde khynñiuh jumai.
   3. Shipai ki sdang ban leh baheh
      Ia ki khasi ki sdang ban beh
      Ki shoh ki bom da u lathi
      Haba shong dih duma bapli
   4. Kumta ki iaid ki por ki sngi
      Jynthut kynjat ia ki bapli
      U Subedar da ki khmat sniew
      Byrngem byrsit bad ka bynthiew.
   5. Kynthei khynnah ba iaid lynti
      Shipai kynshleiñ ki shait ia ki
      Kharlieh khariong ki sdang mynta
      Ia thei bhabriew ban leh samla.
   6. Shipai Tirot i ia kata
      Hapoh hapoh ki sat hi sia,
      Ha ri jong ngi pha wan lehkhraw
      Shisien ka sngi sha shnong Iawpaw
   7. Ha shkor Tirot ka poi khubor
      Ba khar surok la leh donbor
      Sha krem pubon u lum ia ki
      Ban ia pyrkhat synia bad sngi.
   8. Ko rang kieng wait, ko rang kieng stieh
      Pynkhreh ki khnam, pynkhreh ryntieh.
      Yn leh kumno u ia kwah hi
      Ngin mait naphang mynta ka sngi,
   9. Kumba ju leh naduh hyndai
      Sha Lum Kyllang u leit shimsmai
      Waitlam Tirot u sei jliah mluh
      U ai ka dem u ai ka nguh.
   10. Nangta u phai shaphang mih ngi
       U peit kylleng ka Ri Khasi
       Ko Lei Shillong, me ruh ai bor
       Ba ngan beh krat nongshun shukor.
   11. Katba Tirot u dem duwai
       Jingjop kynrad ia u bu’n ai
       Monbhut, U Khein, Lorshon Jaraiñ
       Hima la jong ki ieng pynkhlain.

KA BYNTA KI SAMLA KYNTHEI

1. Arngut ki thei samla
   Ba la suhbuit lypa
   Ki iaid ki leh mynleh
   Ia rang ban pynkyndeh
2. ‘Sano kit kato ka khoh?’
   ‘Ngin leit kheit jamyrdoh’
   ‘Long ma ngi leit lang?’
   ‘Ym bit ia ki shynrang.’
3. ‘Kumno la long kumta?
   Ma ngi dei briew babha’
   Da long kumta te.. ale
   ‘Tangba peit wat babe.’
4. ‘Ale ale ki khot ia ki’
   Ryngkat-ryngkat ka khawoit kti
   Shipai ki iaid pynsted ki kjat
   Jingim jong ki la kut artad.
5. Ki pukni bhur la iohi lypa
   Baki la ngat ha tyngam u Khla
   Ha suinbneng ki her ki swait
   Katto lah lim ym don ban lait.
6. Tlang ki jah ki thei samla
   Shipai ha khlaw ki wad ruma
   Bhat kynsan na lyngthohdoh
   Mano ba pam da ka wait bnoh?
7. Ki wei pat de shu Ah shu Uh
   Ha sum,waitlam liem khru ru ru.
   Shiphang shuploin da lut hiphar
   Jaka la tip kum ka ‘Pamkhar’
8. Ha ka buit ki thei samla
   Shipai mutsniew ym don jaka
   Ka kharpoi ei khar pohrati
   Shu kynduh ei ‘Apot sepsngi.’
9. Ha Nongrimai wei pat jaka
   Don sa kawei ka thei samla
   Hapor ka bneng ba rang ba shit
   Ki jain shikhung, tyrpeng ka kit
10. Shipai tang mar iohi ia ka
    Klongsnam kyndeh u tied ruma
    ‘Sano kong thei leit maphi?
    ‘Sha kshaid saitjain jubab ia ki.’
11. Khlem kynjoh ktien khlem ioh jingbit
    Kum shriehbongkaw ki leh shongshit
    Ka pat ka jam sha khmat ka iaid
    Kyrteng jong ka dei Phan Nonglait.
12. Katba ka dang saitjain saitnep
    Ki pat peit siar na poh kyllep
    ‘Shano kan lait mynta ka sngi
    Mynsiem soittan pyrkhat ma ki.’
13. Shiphang katai ha thwei ka jngi
    Ni jingbhabriew la kum puri
    Kum kui pyngkat ki khie wahleng
    Shipai dikhar, shipai phareng.
14. Suloi ki buh harud ka wah
    Ban ioh jngi lang bad ka ki kwah
    ‘Ap seh kong thei, ma ngi kwah jngi
    Ap seh kong thei ryngkat bad phi.’
15. Pum bad pum ki noh ha um
    Ki beh ia ka katba dang sum
    Mar kumta ‘swut’ ‘swut’ ki her ki khnam
    Na krung, na met ‘namsop’ ki ngam.
16. La shet la shet ka thei ia ngi
    Ki ia kyrthat katba dang jngi
    U Monbhut pat nalor jrong dieng
    Shi khnam pyllait, mih khlein jabeng.

BYNTA BA LAI

1. U Subedar u sdang sngewthuh
   Niangkhriat ka par ha u kumjuh
   Wut wut u her sha David Scott
   Ban ia thuh la jingshem lanot
2. “ I Skat Sahep ka kam la kut
   Shipai jong ngi la jan liem lut
   Ym lah ia leh ia buit riewkhlaw
   Jingtriem jong ki shisha ka paw”
3. “ Balei maphi, phi ia khuslai?
   Ki tup ki man kine byllai.
   Shusiat ia ki, shu shanmari
   Kan ia iaplut kane khasi”
4. Jling riew ka tup, dain riew ka man
   Shaphrang ki tur, kim shem kynran
   U Bedingfield bad u Borton
   Sahep pyrton khrup ki kyllon.
5. Ha khmat ka tup shyrkhei sngiewtieng
   Mano ban lait mano ban ieng
   Khlem riej ia khun khatduh hangta
   Namar ka dei thma khadsawphra.
6. Is kat sahep shiteng synnia
   Kulai kadom pynsuh wia wia
   Pisa u bret harud lynti
   Shipai beh kjat lyngngoh bapli.
7. Sarkar Phareng ia suk tyrwa
   Tirot u mih na khyrdop Nongkhla
   Kum riew don main sha soh Mylleng
   Tawiar sawdong shipai phareng.
8. Ba ia u ki rah sha Dhaka
   Ha byndi set, ki shet kylla
   “Ym pyllait suk, syiew mraw menlong
   Pyndem ha ngi ia u” ki ong.
9. U Syiem Tirot ym shem pyndem
   Mynsiem ieit Ri ha u ka rhem
   “ La ka iap kum paidkar ha iing byndi
   Ban ia balong Syiem mraw ha la ka ri.”
10. Ka ne kein dei thma khadsawphra
    Long dien mynta, ieng la ri ban da
    “ Kane ka dei ka ri jong nga
    Ka ri um snam u Kni u Kpa”

( Contact No. 94361 04622 )