“U Blei u ieit ia ki pohjait ka pyrthei!”

AIS Suja

U Blei u ieit ia ki pohjait ka pyrthei, bad ia kita kiei kiei ruh ia kiba ba la niewbein. 1 Korinth 1:28. Ka long ka jingshisha ba ha ka jingim briew, bunsien u briew u ju niew poh ia ki para briew kiba duk ba kyrduh, ki bym don jingstad jingshemphang, ki bym don ka bor ka buit. Katno tam ia kito kiba la ngop ha ki jingdih buaid, kiba leh kam sniew bad kumta ter ter. U para briew bunsien u ju niew poh ia u para briew, u bym don kam don jam, uba shu trei im kyndoi ja kpoh, uba trei mynta bam mynta, ia kiba kum kine kein bunsien ki ju shah kren bein bad ibein ha la ki para briew, ha la ki paralok ne wat ha iing lajong.
Hynrei hangne ka don ka khubor ba bha na ka bynta kita ki pohjait ka pyrthei ia kiba ka pyrthei ka ibein ia ki, hynrei u Blei u ieit ia ki, u wad ia ki, ia kita kiba la shah kyntait ha ki parabriew ha kane ka pyrthei, u Blei u donkam ia ki. “U Blei u jied kein ia kita kiei kiei ia kiba la shah niew bein, u Blei u jied ia kita ki bym long ba un pyllong ia ki, namar u pynduh noh ia kita kiei kiei kiba long. Ka daw ka long – ba ka doh baroh kan ym ioh leh sarong ha khmat u Blei”. 1 Korinth 1:28-29.
Bunsien u Blei u ju pyndonkam ia kita kiba ka pyrthei ka la kyntait kiba biej kiba la shah khein biej ha ki biew kane ka pyrthei. U Blei u ong – “U Blei u la jied ia kita kiei kiei kiba biej jong ka pyrthei ba un pynlehrain khop ia kiba stad” 1 Korinth 1:27.
U Blei haba u ong “Ia kiba stad” kam mut ia kito kiba don ki kyrdan ne degree. Hynrei ia kito kiba stad ia ki jong kane ka pyrthei kein ki bym shemphang ei ei ruh em ia ka jingstad ba kynja Blei. Ki bym kohnguh, ki bymngeit, kiba leh awria bad kiba kum kita ki long ki jingstad bad jingleh pyrthei, ki bym sheptieng burom ia u Blei kein. U Blei u ong – “Namar ha ka jingtad u Blei, kata ka pyrthei kam shym la ithuh ia u Blei. Namar u Blei u la ibit ba da ka jingibiej jong ka jingialap ban pynim ia kita kiba ngeit. (ka jingstad u Blei dei kaba ialap ia ka ktien u Blei kein ia ka ban pynim ei ia kita kiba kwah ban ngeit. Namar ka jingngeit ia ka ktien u Blei, kam jia da kaba pynbor hynrei da ka jingsliang kein) 1 Korinth 1:21.
Dei na kata ka daw u Blei u khlem wad ia kiba stad, u khlem wad ia kiba don burom jong kane ka pyrthei, hynrei ia ki pohjait kein ban pynim ei ia ki ia kiba ka pyrthei ka la kynshi kyneh bad buh sha kyndong, hynrei u Blei pat u pyndonkam ia ki.
Peit kumno u Blei u jied ia kita kiba la khein pohjait ia ki – shisien u Jisu u la dei iaid lynti nangta u la iohi ia u briew uba kyrteng u Mathaios ba u shong ha iing khrong, u Jisu u la ong ia u, To bud ia nga, u Mathaios u la ieng bad bud ia u Jisu. U la jia ruh haba u Jisu u dang iashong bam ha iing uta (Mathaios), te bun ki nongkhrong bad kiba pop ki iawan bad iashong shaniah lem bad u Jisu ryngkat bad ki synran jong u de. Haba ki pharisi ki la iohi ia kata, ki la ong ha ki synran u Jisu – Balei ba u Nonghikai jong phi u iabam lem bad ki Nongkhrong bad kiba pop ruh? Haba u Jisu u la iohsngew ia kata, u la ong ha kita ki Pharisi “Kiba khiah kim donkam ia ki nongpynkhiah; hynrei kiba pang kein” Mathaios 9:9-12.
Hangne ngi iohi ba u Blei lyngba u khun jong u, u Jisu Khrist, u la wan ban wad ia kiba pop kiba la jot la rem kiba laduh jingkyrmen khlem jingkyrmen shuh, hynrei u la ai ka jingkyrmen bad ka jingpynim ei ia ki namar ba ki kohnguh bad bud ia u Jisu u Trai. U Blei u wad ia ki nongpop bad kiba la leh pop ki pop ba bun jait, hynrei u Jisu u kular ban ai jingim bymjukut ia ki.
Kiei kita ki Pharisi? Ki long ki briew kiba sngewriewblei sngewhok sngewkyrpang ialade da kata ka jingsngewniam sngewrukom jong ki, da kata ka jingpyndep niam pyndep rukom jong ki, da ki jingknia ia kiba u Jisu um mon shuh. Dei na kane ka daw u Jisu u ong ha ki khie leit ma phi to hikai ia kane: ia ka jingisynei nga mon, hynrei ym ia ka jingknia. Naba ngam shym la wan ban khot ia kiba hok, hynrei ia kiba pop BA KIN KYLLA KABA MUT” Mathaios 9:13.
U Jisu u iohi ia kita ki Pharisi ki long kiba sngewhok ialade da kata ka jingleh niam jong ki. Ki sngew ba ki long kiba hok hynrei kim tip ba ki long pynban ki nongpop kiba khraw tam, kiba hok najrong pop shapoh.
Dei na kane ka daw u Jisu u pynrem ia ki Nongthoh bad ki Pharisi. U ong wat leh kumba leh ki Pharisi “Naba ki teh ki jingbah kiba khia bad kiba eh ban bah, bad ki buh ha ki tyrpeng ki briew, hynrei kim mon ban iarap ia ki da ka kti jong ki. Hynrei ki leh pyndep rukom tang ban iohi briew ……. Ki ieit ia ki jaka ba don nam tam ha ki jingkhawai” Mathaios 23:3-6. Ki Pharisi ki long kiba kwah burom ym ki nongiarap, ym ki nongisynei. Hynrei u Jisu u la wan ban wad ia ki bapoh tam jong ka pyrthei.
Ka long kaba sngewtynnad shisha ia ka jingieit u Blei, tang lada u briew u kohnguh ia ka ktien u Blei bad iaid ha ki lynti ka jinghikai ka ktien jong u. U ong – “U rah ia uba duk (bapoh jaid ka pyrthei) na ka khyndew bad u kyntiew ia uba rangli na ka thliew sboh (ahor ka pop), ba un ioh buh ia u ryngkat ki bakhraw batri, ki briew jong u kein” Salm 113:7.
U Mathaios, u long uwei ia uba u Blei u la rah ia u sha ka burom, na ka jinglong nongkhrong kum uba pop, sha ka kyrdan bakhraw batri ia uba ka pyrthei ka dang pule ia ka Gospel jong u, ka khubor babha kein jong u Jisu Khrist u Trai.
Ka ktien u Blei namar kata ka pynkynmaw da kaba ong – “Wat ai ba u riewstad un sarong ha ka jingstad uba khrawbor, wat sarong ha la ka bor, uba riewspah to un nym sarong ha kita ki spah jong u” Jeremaiah 9:23. Namar ka jingsarong ka pynjot thiaw. Hynrei phai sha u Blei uba kloi ban pdiang ia kiba kum kita, kiba la jot ha ka jingsarong na ka daw ka jingstad, na ka daw ka jingsngew khrawbor ialade, na ka daw jong ka spah, kam pher wat lada ka pyrthei ka la kyntait, hynrei u Blei u wad ia kiba kum kita, bad u ieit ia ki pohjait tam jong ka pyrthei.
Balei ka long kumta? “Namar u Blei um ju khmih kumba khmih ki briew” u briew u iohi tang ia ka dur ba shabar, hynrei U TRAI U IOHI IA KA DOHNUD” 1 Samuel 16:7.
“Lada men shah shkor ia ka ktien u Trai bad sumar ia ki Hukum jong u ……. U Trai u Blei jong me, un kyntiew ia me ha khlieh ka jaid bynriew ka pyrthei baroh” Deuteronomi 28:1. Kumta u Blei u ieit ia ki pohjait ka pyrthei tang lada u briew u kloi ban shah shkor ia ka ktien u Trai bad ban sumar ia ki hukum jong u. Amen.