“Ka khlieh kum ka khlieh ksew” ong u myntri Madhya Pradesh ia ki heh BJP

Bhopal: U myntri ka sorkar Madhya Pradesh, U Sajan Singh Verma, ula ther tyngeh mynta ka sngi, halor ka jing pyrshah jong ka seng BJP, ia ka sorkar Jylla, ba ka pyn kynriah kam ia ki 46 tylli ki ksew syntiat jong ka sorkar bad u myntri, ula kynnoh ba kaba kum katei ka jing pyrkhat, ka pyni ba kitei ki briew, ki don ia ka khlieh kum ka khlieh ksew.
U Sajjan Singh Verma, u ong ba haba ki ksew, ki lah ban trei kham bha ha kiwei pat ki jaka, kumta kam don jingwit satia ban pyn kynriah ia ki. “Lada ki pyndonkam da ka kyntien dog squad, ka kham sngew iahap, hynrei ki ong ba ngi kynriah kam ia ki ksew. Katei ka pyni, ba ki ruh ki la don ia ka khlieh ksew, kumta ym lah ban leh eiei ia kata”.
Naduh ba ka wan ka sorkar Congress ha Madhya Pradesh, ka la don shibun ka jingshah kynthah jongka, ha ka seng BJP, halor ka jing kynriah kam jongka, ia shibun ki heh sorkar, hynrei ka jing kynriah kam ia ki 46 tylli ki ksew lei, ka la nang pynshit shuh ia ka jing ia tai, hapdeng kitei ki ar liang mamla.