Ki don shisha ne em ki jingthaw ba phylla, kiba la ri la sumar da ka sorkar America bad katei ka dei ka mat, kaba baroh ki briew ha katei ka ri America, ki lyngngoh bad kim thikna satia haduh ha kine ki sngi.
Katei ka dei ka mat, kaba ka jingiakren, ka jur bha ha kine ki sngi, namar ba ka jingshisha, kam shym la paw satia bad katei ka dei ha kawei ka jaka, kaba la tip kum ka Area 51.
Ki don kiba iakren ba lehse, kin lah ban don kino kino ki kynja jingim, kiba don ha katei ka jaka kaba ki khot Area 51, lane ka Lincoln County, kaba don ha Nevada, ha United States.
Katei ka dei ka jaka, kaba ka jing pahara ka jubor bha bad ka dei na katei ka daw, ba ki don shibun ki jing antad shaphang katei ka jaka bad kiba don ruh kiba sngew thikna ba ki don ki jingthaw ba phylla lane ki briew kiba na kiwei pat ki met bneng.
Don kiba ngeit ruh shaphang ka jinghap ka liengsuin kaba phylla ha katei ka jaka, ha kaba la shim ba kitei kiba hap ha ki phew snem mynshwa, ki dei kitei ki riew phylla, kiba wan na kiwei ki met bneng.
Haduh mynta ka sngi, ka don ka peij ha facebook, kaba la iawer ban ia leit tur noh sha katei ka jaka ha ka 20tarik Nailur 2019 bad haduh mynta ka sngi, ki la don 8lak ngut kiba la mynjur ban ia leit tur beit beit sha katei ka jaka ban leit khynra hi dalade ia ki jingdon jingem ha katei ka jaka lane ban leit wad ia ki riew phylla ruh, lada ki don ha katei ka jaka pahara kaba la pahara skhem bha da ka America.
Phi don ban ong eiei?