SNGAP! BA KA UMΪAM KA ΪAM

(Ka khubor na ka bynta ka mei mariang)
Mr.D. Nongpoh

1. Kyrteng jong nga dei ka Umïam,
   Nga dei ka um b’la bna ka nam;
   Nga dei ka Dam,tyllong jingshai,
   Nga dei ruh de jaka peit kai.
2. Haba nga phai sha ka mynnor,
   Nga sngew kumba ummat kin tlor;
   Mynnor nga dap, pahuh kyrhai,
   Mynta dohnud la piah therai.
3. Haba nongwei wan peit ïa nga,
   Katno mynsiem lynga, pisa;
   Haba marwei nga shong pyrkhat,
   Nga sngew kum ban tap la ka khmat.
4. Mynta jingim tap lyoh ba dum,
   Nga long ‘lai-nili-kit-synrum;
   Jaboh jabaiñ na sor Shillong,
   Mynta ha nga ki la wan shong.
5. Katno lei lei mynsiem ka kthang,
   Haba Plastic ha nga wan lang;
   Naduh nangtei na sor Shillong,
   Plastic ki tuid ha nga ban shong.
6. Jakhlia trai Ri bad u mynder,
   Mynta halor jong nga ki per;
   Sha nga la shu pynnguid jubor,
   Man la ka sngi, man la ka por.
7. Kumba ar hajar ar phew san
   Million litres jaboh ki wan,
   Man la ka snem kine ki tuid
   Sha nga ban pynduh ïa jingkhuid.
8. Ϊa Umshyrpi nga la isih,
   Katba ki sngi ki por nangmih;
   Kumjuh ruh de ïa Wah Umkhrah,
   Ban tuid sha nga, mynta ngam kwah.
9. Ynda nga la ïa kren bad ki,
   Ki ong “imat la kut ki sngi,
   Ϊa ngi ban ïoh jingim ba khuid,
   Kum ha mynnor kynjai ban tuid.
10. A! ko Umïam, tip ngi lynga,
    Ngi la lehraiñ ban tuid sha pha,
    Ha tlang lehraiñ ïa la jingrit,
    Ha lyuir sha pha ngi theh ka tngit”.
11. Umkhrah, Shyrpi nangta ki ong,
    “Katno dohnud jong ngi ka mong;
    Bynriew mynta ïa ngi um kheiñ,
    Na por sha por u la lehbeiñ”.
12. Ngi ruh kum phi ha ka jingdum,
    Ngi long, ‘lai-nili-kit-synrum;
    Kane ngim leh da la de hi,
    Hynrei bynriew u thom ïa ngi.
13. Umïam katno ka sngewsih jur,
    Ϊa ka jingkren kine shijur;
    Ki thei bl’a mih na shnong jingshai,
    Bl’a kup mynta dur khmat ringswai.
14. Lano ka kmie u khun bynriew,
    Kan ïeng bad kan kyndit bynriew?
    Umïam ka la buh jingkylli;
    Lano jingkhang ba khuid kan plie?
15. Balei kumne a! khun bynriew?
    Ϊa nga me pynjot bad pynsniew?
    Kynmaw, kynmaw kane kawei,
    Men leh kumne, shisien ngan bthei.
16. Jingkhot ïa phi mynta ka long,
    Ko! Ki paidbah ka sor Shillong;
    Ϊa Wah Umkhrah bad Umshyrpi,
    Sngewbha wat pynjaboh ïa ki.
17. Jingkhot kumjuh ka long ïa phi,
    Ba shong ‘rud lynti ïaid jong ki;
    Kynmaw leh khuid katba phi lah,
    Ϊa Umshyrpi bad wah Umkhrah.
18. Ϊa dur bha briew jong nga kynmaw,
    La rwut dur bha d’u Trai Nongthaw;
    Nangïaid ki sngi, nangïaid ki por,
    Ka nam jong nga wat pynhiar dor.
19. Ïa wah Umkhrah bad Umshyrpi,
    Pynkhuid katba nangmih ki sngi;
    Lada mem leh, tip ngan khuslai,
    Shisien ka sngi men duh jingshai.