Lah ban shah pynshitom u Ma Ngaitlang bad u Ma Sniawbha Ba rem u Bah Pala na ki konstitwensi jong ki

Shillong, 19 Jymmang:
Ka MPCC ka lah ban pynshitom ia ar ngut ki MLA kynthup u Bah Ngaitlang Dhar na Umroi bad u Bah Sniawbhalang Dhar MLA na Nartiang namar ba ha kane ka MP elekshon, u kyrtong ka Congress u bah Vincent H Pala u la shah rem na kine ki ar tylli ki konstitwensi jong ki.
Kine ar ngut ki dei ki shi para bad ha kane ka elekshon la mih ka khubor ba ki kyrshan ia u kyrtong shimet  Pastor PBM Basaiawmoit.
Haba kren mynta ka sngi Nyngkong hadien ba la wai ka jingialang, u President ka MPCC u la ong ba ka seng kan sa shong ban pyrkhat halor kane ban wad ia ka daw hynrei um da kren shai la kan pynshitom ne em ia ki. “Ha ka party Congress kaba dei ka iing kaba heh, ki don ki jingiakhih ki iakhun para dkhot hynrei kam ju lei lei bad ki iasngewthuh jingmut biang”, la ong u Bah Lapang.
U la ong biang, “Long kum shi para ki iakhih ialympat hynrei ynda dei ka por bam ja, ki ia wan ban shong ha kamra shet ja ban iabam lang”,.
Ha kane ka elekshon ba dang shu dep, u Bah Pala u la ioh 3071 vote na Umroi bad 5666 vote na Nartiang katba u Pastor Basaiawmoit u la ioh 5640 vote na Umroi  bad 7696 vote na Nartiang.  Kane ka mut ba u Pastor Basaiawmoit u la tam 2569 na umroi bad u tam 2030 vote.
Ha kawei ka liang, u Bah Lapang u la kyntait ha kawei ka liang ba ka jingjop jong u Bah Pala, ka dei kaba na ka bor jongu, bad u la ong, ka dei ka jingjop jong ka party baroh kawei.
U la ong ba ka party kan leit sha AICC ban iakren iaphylliew jingmut halor ka jingshah rem ha ka elekshon na Tura bad ha ka ri baroh kawei.
U la ong ba ka jingshah rem na Tura, u la ong ba kam dei kaba shu rem jem hynrei ka dei ka jingiakhun kaba jwat bha wat ia u nongialam ka NPP u Purno A Sangma ruh. “U Kyrtong jong ngi, u shah rem salit haba bishar ia ki vote ba u la ioh ha kane ka elekshon”, la ong u Bah Lapang.
Hynrei katkum ka jingpaw ha ka resol, u Purno  u la tam ha baroh ki konstitwensi,  lait noh tang ha ka konstiwensi u Mukul ka Ampati, ka Mahandraganj ka long jong u Mukul ka Dikanchi Shira bad ka konstwensi jong u Clement R Marak ka Sesella, bad baroh la khyrwait lut u Mukul.