Pynkut U President ia ka Lok Sabbha

Shillong,18 Jymmang:
U President ka Ri u  Pranab Mukherjee  mynta ka sngi, u la pynduh pynkut por, noh ia ka jingtreikam ka dorbar Lok Sabbha barim, kaba dei ruh ka dorbar, kaba la ialam da ka seng Congress hadien ba la pyndep ia baroh ki jingdonkam shuwa ban thaw ia ka sorkar kaba thymmai.
“U President u la pdiang ia ka jingai jingmut jong ka kynhun Myntri, bad mynta ka sngi u la soi ia ka hukum ba la pynduh noh ia ka Lok Sabha kaba 15 kum ka bor ba la pynkup ha u katkum ka  sub-clause (b) of Clause (2) Article 85  jong ka Riti synshar”  ong u Press Secretary ka Rashtrapati Bhavan u  Venu Rajamony.
Ka sorkar ba rim kaba ia lam da ka seng Congress ka la pynlong ia ka jingialang ba khadduh jong ka mynhynnin ka sngi hapoh ka jingialam u Myntri Rangbah Duh barim ka ri u Dr.Manmohon Singh , bad ka la bthah ia u President ban pynduh noh mardor ia ka Lok Sabha kaba 15 . Hadien kata, u parliamentary affairs minister u Kamal Nath u la aiti ia ka rai jong ka Cabinet sha u President.
Lah ban pynkynmaw ba ka BJP ka la ioh ia ka jingbun paid hadien ka resol jong ka elekshon MP 2014 ha kaba ka la ioh haduh 282 ngut ki MP katba ka Congress pat ka la ioh tang 44 ngut. Ka Election Commission mynta kan phah  ia ka kyrteng ki MP ba la shah jied ha ka 16 lok Sabha sha u President ka Ri. Ki kyrteng ki dei jong ki 543 ngut ki MP bad yn leit aiti sha u President da ki lain gut ki dkhot ka EC ba la khlieh da u chief election commissioner V S Sampath.