La thaw ia ka JIC ban iada jaboh ia ka wah Umshing

Shillong, 18 Jymmang:
Ka Meghalaya State Pollution Control Board (MSPCB) ka la thaw ia ka Joint Inspection Committee ka ban kitkhlieh ban pynthikna ba ka wah Umshing kan nym jaboh na ka jingbuh ia ka jaka shohdoh jong ka Animal Husbandry and Veterinary ha Mawlai Mawiong.
“Ngi la thaw ia ka Commitee katkum ka jing bthah ka High Court ka Meghalaya,”  la ong u chairman ka  MSPCB Bah M Allya.
U la iathuh ba ki la thung ia uwei u dkhot na ka Central Pollution Board (CPB)katkum ka jing bthah na ka Kashari.
Ha kajuh ka por, u chairman ka MPSCB u la ong ba ka Inspection Committee kan pynlong ia ka jingleit jngoh ia katei ka wah shen.
Haba bishar ia ka dorkhas ba la ujor da u Rangbah Shnong ka Mawiong Umjapung bad Mawiong Rim, ka High Court ka Meghalaya  ha ka 8 tarik Iaiong ka la pynmih ia ka hukum da kaba bthah ia ka sorkar jylla ban kan thaw ia ki lad ki lynti ban pynthikna ba ka wah Umshing kan nym jaboh namar ba ka jingdon ka jaka shohdoh.