U dewiong bad ka ain teh kyndon MMDR Act

Ka kashari jong ka sorkar India, ka la rai ban pyllait noh ia u dewiong, na ka jingkhang jong ka National Green Tribunal (NGT) bad katei ka la long ka khubor kaba bha ia u paidlang ka Ri Khasi Jaintia, namar ba kham kloi (lehse) lada kam slem, ba kin sa ioh ban sdang biang ia ka kam trei dewiong jongki.
Hynrei ngin hap ban sngewthuh ba katei ka rai jong ka Supreme Court, ka dei tang ka jingsdang ban weng ia u saiteh saikhum, uba la syrdoh sohsat bha ha ki san snem ba ladep bad ngim tip, la katei ka rai jong ka kashari, kan lah ne em ban urlong ha ki shibnai ar bnai, kumba don kiba khmih lynti lane ioh lehse, kan shimpor pynban da ki snem ruh, namar ba mynta ki don ar tylli ki mat kiba kham kongsan bad kitei ki long ka ain tih dewiong ban pynkhreh da ka sorkar Jylla bad ar sa ka jingmynjur jong ka tnat tih dewiong lane lyngba kata ka MMDR Act.
Hynrei halor katei ka phang, ngi iohi ba mynta ki don ar kynhun kiba ia kynnoh iwei ia iwei pat halor katei ka ain MMDR Act, lane ka ain mar poh khyndew, ha kaba ki nongialam ka sorkar Jylla, ki shim ba ka rai jong ka kashari, ka dei ka jingjop na ka bynta jong ka sorkar bad ki trai dewiong, katba ka liang pyrshah lane ka seng Congress, ki kren duh mynsiem, namar ba ia ka kam tih dewiong, hap ban ioh jing mynjur lyngba katei ka tnat jong ka sorkar India.
Lada ngi iakren ia katei ka mat, ngi tip shai ba baroh ngi kwah ban lait na kitei ki kyndon jong ka sorkar India, namar khlem pep, kan dei ka kyndon kaba jyrwit jyrwat bad kaba ki trai par dewiong, lehse kin shem shitom ban ia dei bad katei ka tnat jong ka sorkar India, na bynta ka kam, kaba man ka sngi jongki bad ia kata, ngi kynmaw ba ka sorkar Congress ruh, ka kren hi ia kata bad wat kane ka sorkar NPP ruh, ka iaid hi ha uta u juh u lain.
Katba ka jia, katei ka dei ka mat kaba la iakren naduh mynshwa, ha kaba ka sorkar India, kam shym la lah satia ban pyntrei ha ki jaka jong ka 6th Schedule bad ha kane ka kynti ruh, ka la dei ban nym ia wad burom, hynrei ka sorkar Jylla lem bad baroh ki seng sain pyrthei, ki dei ban iakhun tyngeh ban weng ia katei ka ain MMDR Act.