Ba jur slap palat, twa ka surok Mawsynram ban leit Lawbah

Shillong: Na ka daw jong ka jingjur palat jong u slap ka surok na Mawsynram ban leit sha ki thain Lawbah,harum Wah Mawlangdiar, ka la twa mynta ka sngi bad kane ka la pynlong ba ki kali kim lah shuh ban leit ban wan na Mawsynram sha Lawbah. Ka jaka jong katei ka jingjia, ka dei kaba jngai kumba 3 Kilometre sharum jong ka shnong Mawsynram.
Katkum ka jingiathuh ki briew na katei ka jaka, ki la ong ba kane ka jingtwa jong ka surok ka long ha riat Mawksir, ka jingtwa jong ka surok ha kane ka jaka ka la pynlong ia ki bun phew tylli ki shnong kiba dei ban iaid lyngba kane ka surok hapdeng ka jingeh.
U Bah Alvin Sawkmie MDC jong ka Mawsynram u la iathuh ba u la ioh ia kane ka jingtip mynta ka sngi ha kaba ia dei bad ka jingtwa jong kane ka surok, u la iathuh ba la shai ka sngi un leit hi da lade ban peit ia kaei kaba lah ban leh khnang ba ki paidbah kin nym ia kynduh jingeh.