Shillong: U CEO ka Divalicious Mrs Universe Pvt Ltd, u Naresh Madaan, ula pynbna ia ka jingjop kawei ka longkmie ia ka nam lah duh ha ka rynsan iakop thei bhabriew da kaba wan ha ka kyrdan kaba lai kum ka Divalicious Mrs. Universe 2019.
Kane ka longkmie ba la don ruh ar ngut ki khun ka dei ba shong ba sah na nongbah Shillong ba la tip kyrteng kum ka Tina Momin Das bad ka la ioh rah ia ka nam jingjop ha ka jingiakop kum ka thei bhabriew ha ka rynsan iakop ia ka Divalicious Mrs. North East India Universe 2019.
Haba iakren bad ki lad pathai khubor hynnin ka sngi, ka Tina ka la pynpaw ka don jing thrang ban leh eiei ban iarap na ka bynta ki kynthei jong ka thain shatei lam mih ngi ba kin lah ban pynurlong ia ka jingphohsniew jong ki.
“Nga la pynkhreh ruh ia lade ban leit ia shim bynta ha ka jingiakop thei bhabriew ban long shabar ka ri India na u bnai Naiwieng,” la ong ka Tina.
La iathuh ruh ba ka la shah jied ban long ka State Director na ka bynta ka Meghalaya, na kane ka seng ba la tip kum ka Divalicious Mrs. Universe Pvt Ltd.
Na ka liang, u CEO u Madaan u la pynpaw ba ka Tina, hadien ba la shah jied kum ka State Director ka la donbor bad ka la lah ban jied ia ki nongiashim bynta ban phah sha ki jingiakop thei bhabriew bapher bapher kum ka Mrs. Heritage World, Divalicious Mrs. Curvy Queen of India bad ka Elite Miss World ka ban pynlong da ka Divalicious Mrs. Universe Pvt Ltd.
Lah ban kdew ba ia kane ka jingiakob thei bhabriew ba la ioh rah da ka Tina la pynlong ha Palm Green Resort ha Delhi, ha kaba 30 ngut ki nongiashim bynta ki la wan na kylleng ka ri India.
Haba kylli, u la ong, “Ha Meghalaya la iohi ba ki don bun ki jingiakop thei bhabriew hynrei kine kum ka Miss Shillong, Miss North East bad kiwei kiwei hynrei ia kine ki jingiakop khlem pat ithuh da ka sorkar India.”
U la pynpaw ia kane da kaba ong ba ia ka Divalicious Mrs. Universe Pvt Ltd la ithuh da ka sorkar pdeng.
Phi don ban ong eiei?