Ka UDP sa sha Rajya Sabbha?

Lyngba ka jingsei nia madan, U bah BM Lanong, uba dei uwei na ki MDC ba dang shu dep bam smai sha Khasi District Council, ka pyni shai ba ka UDP, kan dang iaid dawa biang ia ka bhah jongka na kane ka sorkar Meghalaya Democratic Alliance (MDA) bad khlem pep, kan lah ban leh beit, da ka buit sianti jongka, ha kaba kan iaid beit shakhmat, kumba ka la leh ha ka elekshon MP, ha kaba ka la iaid shaneng sharum bad pynbna ba u kandidet jong ka seng UDP, un dei u kandidet jong ka seng MDA bad ba u kandidet, un ialeh ha ka shap jong ka bom bad ba kiwei pat ki seng, kin ia thep lang baroh baroh ha ka bom.
Na kaei kaba ngi ia tip ha shwa ka elekshon Lok Sabbha, la sngew kumba ka elekshon Rajya Sabbha, kan leit sha ka bhah jong ka NPP, hynrei lyngba ka jingkren jong U bah Bindo Lanong, ka pyni shai ba utei u nongialam, un nym ialam bakla satia ia ki paidbah, hynrei ka pyni ba ka UDP, ka dang iaid shakhmat ban wad ia u briew, uba bit duh na katei ka seng bad ba kin pynbor sha ka kynhun MDA, ba kin kyrshan ia utei u kandidet ha ka elekshon Rajya Sabbha, ka ban long la shem snem bad hangta kan wan biang ka mat, ba ka UDP, ka dei ka seng kaba ha khmat duh, kaba kyrshan ia ka NPP bad kumta, katei ka bhah jong u dkhot sha Rajya Sabbha ruh, ka dei ban leit sha katei ka seng, lane lada kim kyrshan, kumta ka don ia kawei pat ka lynti, ha kaba ka lah ban wad jing kyrshan nawei pat.
Ki seng kiba don ha kane ka sorkar synrop, lada dei ka NPP, HSPDP, PDF lem bad kiwei kiwei, ki la dei ban kyndit thiah noh mynta, lyngba katei ka jingphla jong U Bah Bindo, namar ba katei ka mat, kan nang iaid ha ka jing iakren ha ki sngi ki ban sa wan, ha kaba ka Congress kaba dei sa kawei pat ka seng heh, kan peit ha kliaw bad shim kabu ban pynkhih ia kane ka sorkar MDA.
Ngin dang ia peit, hynrei ngi iohi ba ka elekshon Lok Sabbha, ka dei kaba kongsan tam, hynrei ka la shu pulom ei khamakha, namar katei ka jing ia khwan lalot tasam, nangta ka wan sa ka bhah MDC sha Khasi District Council, ha kaba ka la ioh kam trai ka UDP bad nangta sa kiwei pat ki political appointment kiba paw khah khah, kiba dei na katei hi ka seng. [rms]