Weng ka Supreme Court ia ka jingkhang dewiong ha Jylla

Hadien saw snem tam kynthih, ka Supreme Court, ka la bret noh sharud ia ka hukum khang tih dewiong jong ka National Green Tribunal (NGT) ha ka Jylla hi baroh kawei bad katei ka hukum, khlem pep, ka la ailad biang ia ki trai shnong jong ka Ri Khasi Jaintia, ba kin ioh ring mynsiem ialade, ha ka kamai kajih, ka ioh ka kot bad ka roi ka par.
Kam dei tang katta, ka don sa kawei pat ka rai, kaba kham kongsan bad kaba thew jngai ruh shi katdei bad kata ka long ba ka Supreme Court, ka ithuh ba u trai jaka, u don hok ban long trai ia ki mar poh khyndew, kiba don ha ka jaka jongu bad katei khlem pep, ka dei sa kawei pat ka mat, kaba aibor ia ki Khasi, Jaintia, Garo ba kin sngew trai ha la ka jong ka khyndew ka shyiap.
Ka jingkhang dewiong khlem pep, ka la long ka jingtim kaba khraw ia ka Ri Khasi Jaintia, wat la ha kajuh ka por, ka long pat ruh ka jinghikai bad ka jingsneng, ia ka imlang sahlang ba kumno kin iaid nangne shakhmat bad katei ka jingkyrkhu jong ka mariang, kaba la ai laitluid da U Blei Trai kynrad ia kito kiba don ia ka par dewiong ha ki phew phew snem.
Mynta haba ka kashari, ka la ailad biang ban tih dewiong, kumta ka jing kyrsiew thiah, kan dei shwa ia ki trai jaka puta, ia ki trai shnong bad kumjuh ia ki District Council bad ia ka sorkar Jylla kumjuh, ba ha kano ka dur, kin lah ban pyniaid beit ia katei ka kam shakhmat, ba kan nym pynjot ia ki shnong ki thaw, ia ki jaka puta, hynrei ba kan pynkhie im biang ia ka kamai kajih jong ka Ri Khasi Jaintia nangne shakhmat.
Ka kam jong ka kashari, ka la kut katto bad mynta kaei kaba sah, ka long ba ka sorkar Jylla, kan leh kumno, na ka bynta ban pyniaid beit ia ka kam tih dewiong, kaba shongnia, shongain bad kaba pynmyntoi ia ki nongshong shnong baroh lang.
Ka kam kam pat dei kaba stet, hynrei ka donkam ia ka sorkar Jylla, ba kan peit ia ki ain ki kanun, kiba dei ia ka mariang, wat la ngi tip shai ba ki trai par, ki la khohreh palat, na ka bynta ban sdang noh ia ka kam tih dewiong bad ngi khmih lynti, ba ka Jylla, kan khih khohreh, ban pynurlong noh ia ka kam tih dewiong ha ki khyndiat bnai ban sa wan. [rms]