Kam trei ka lyer u Modi ha Meghalaya, ong u Ba Pala Yn iasaid Garo State u Purno

Shillong, 16 Jymmang:
U MP na Shillong Bah Vincent H Pala u la ong ba ka jingjop jongu ha kane ka kynti kaba ar ka pyni ba ka lyer u Narendra Modi ka BJP, kam shym la treikam satia bad kane ka paw na ka jingjop don burom jong u. Haba kren hynne hadien ba la ioh resol, u Bah Pala u la ong ba ka jingjop jongu ka dei ka jingiatreilang ki MLA bad ka party hynrei ha kajuh ka por, u la ong ba ka jingshah rem ka Congress ha kiwei ki bynta ka ri, ka dei ka jingsneng ba kum ka party ka dei ban iatylli.
Hynrei u Purno A Sangma pat uba jop biang na Tura u la ong ba un leit biang sha Parliament ban iasaid ia ka jingeh jong ki Garo, ym ban rhah ia ka shuki.
U Bah Pala u la bat biang ia ka Shillong hadien ba la pynliem ia

u kyrtong shimet u Pastor PBM Basaiawmoit da 40,000 vote. U Bah Pala u la ioh 2,09,288 vote bad bud sa u Pastor PBM Basaiawmoit 1,68,940 vote, u kyrtong ka UDP Bah Paul Lyngdoh u ioh 1, 06,806 bad ka BJP Bah Shibun Lyngdoh u ioh 95,909 vote.
Ka Shillong ka la don 8 ngut ki kyrtong kiba mih madan katba ka Tura ka don tang ar ngut. U Sangma u la ioh 2,39,301 vote da kaba pynliem ia u Daryl Momin uba ioh 1,99, 585 vote. U Bah Pala u la ong ba ki samla ha ka ri ki kwah ia ka jingkylla bad u sngew kmen ba ka BJP ka la jop donburom bad kyrmen ba kan leh bha na ka bynta ka ri. “Hynrei ngin ia peit kaei ba kan leh namar ba ki paidbah ki la ai ia ka jingshaniah namar ba ki paidbah kin kwah biang ia ka Congress hadien”, la ong u Bah Pala.
U Purno uba jop la shiphew sien na Tura u la ong ba ka jingialeh ka long pyrshah ia ka bor pisa, kiwei ki kam ki jingialap ban ialam pynsngewthuh bakla ia ki paidbah.
U Sangma u la ong ba u la iakhun pyrshah ia ki 13 ngut ki MLA ka Congress bad 20 ngut ki MDCs kaba dei ka kam kaba jwat bha. U la ong ba u ialap elekshon da ka shuki katba u myntri rangbah u Mukul Sangma u ialap elekshon da ka helikopter.
U la ong ba um kwah shuki hynrei namar ba ka shong ha u Myntri Rangbahduh u Narendra Modi ba un jied ha ka kynhun jongu. U la ong ba un iasaid ia ki jingeh jong ki Garo bad ban pan jylla Garo State ban iakhlad noh bad ki Khasi bad Jaintia.