Kyrshan ka JHTOA ia ka JCM&DA

Shillong,16 Jymmang:
Ka Jaintia Hills Truck Owner Association (JHTOA) kaba la pynlong ia ka jingialang mynta ka sngi ha madan 7 mer ka la rai ban ai ka jingkyrshan ia ka Jaintia Coal Miners & Dealer Association (JCM&DA) halor ka jingkhot pa khang surok kaba 12 kynta, naduh ka por 5 baje mynstep haduh ka 5 baje janmiet jong ka 17 tarik mynta u bnai.
Ka JHTOA ryngkat bad ka Jaintia Coal Miners & Dealer Association kin pynlong ruh ia ka jing rah lama iong kum ka dak ban pyrshah jur ia ka hukum ban khang tih bad shalan dewiong hapoh ka jylla, kaba la pyntreikam da ka sorkar jylla katkum ka jingbthah jong ka National Green Tribunal (NGT)
Ka JHTOA ha ka jingialang kaba la long mynta ka sngi ka ka la rai ruh ban khang ia baroh ki trok  ban iaid lyngba ka ri lum Jaintia Hills ha kane ka 19 tarik mynta u bnai, kiba khynthup ia ki trok kit marbam mardih, kit dewbilat, kiba kit ia ki mar ki mata bad kiwei kiwei ki jait trok kum ka dak ban pyrshah ia ka jingleh jong ka Sorkar jylla.
Naka liang u President ka seng u bah Balen Thubru u la kyrpad ia ka sorkar ba kan don ka jingsngewlem ia ki trai truck namar ba da ki hajar tylli ki truck kiba pyndonkam mynta ki dei kiba la shu shim da ka ram na ki bank. Te lada kane ka jingkhang shalan dewiong kan dang iai neh slem kan wanrah ka jingeh kaba khraw ia ki trai truck. Ha ka juh ka por ka seng ka pynrem jur ia ka All Dimasa Student Union kaba tuklar ia ka jakpoh ngi ong u President ka seng.