Ki hati ki long ki mrad kiba stad tam

MM Thaiang

Kat kum ka jingiathuh jong uwei u Nongrep na Block I la ong ba u Hati u
long u mrad uba stad tam. Ka Parom ka ong u Nongrep ha kawei ka miet kaba shai bnai bha ha shnong Pohlarat, u dang ap lyngkha kba ha I iingtrep Kyndang jrongdieng ( A Hut on tree top).Ha kawei ka janmiet, u Nongrep, u la iohsngew ia ka jingpah jong u Hati, uba pah na kawei ka ‘lawbniap, haba u iohsngew ia ka jingpah jong u Hati, ha ka jaka ban leit phai sha iing u la sahbri noh ha kata ka miet.
Ha shwa ba un iohthiah, u la iohi ia u Hati sawkuna uba heh uba wan shapoh ka lyngkha kba jong u. Haba u la iohi u la sdang ban halla, pyrta bad tim tla katlah katiai, hynrei longlehnohei ia u Hati sawkuna bad u la sdang jynrat bad bam ia u kba jong u. U Nongrep haba u la iohi ia kane ba ka jinghalla, jingpyrta bad shohtin jong u kam pynsngew ia u Hati sawkuna; u la tim ia u Hati da ki ktiensih ktien sang. U Hati sawkuna ha ka jaka ban phet sha khlaw beit beit u wan sha uta u Dieng ba don I Kyndang jrongdieng. U Hati sawkuna tang shu poi top ha trai jong uta u Dieng, katlah katiai u la nion bad pyrshang ban pynkhyllem ia uta u Dieng. Ha kaba nyngkong u Nongrep um pyrwa, um khuslai eiei naba u Dieng u long u Diengbah.
U Hati sawkuna haba u la pyrshang ban pynkhyllem ia uta u dieng, um lah ha ka jaka ban phet shapoh ‘lawbah ‘lawsan, u mareh sha kawei ka Wahduid ( a stream) bad hadien ba u la pyndap um ha u Luta, u wan biang sha trai uta u dieng ba don u Nongrep ha jrongkyndang jrongdieng bad kumne shi kumne haduh saw san sien bad uta u dieng u la sdang ban khih bad kynriang satang ban khyllem artat.
U Nongrep haba u la iohi ia kane, u la sdang ban tieng bad mihsyep ba un sa shah pyniap ha u Hati sawkuna naba u la timsih timsang ia u. Hangta hangta, u Nongrep u la sdang ban kren da ki ktien kiba don akor da kaba ong “ Une u Kba uba nga rep lada me u Hati sawkuna me jynrat, me bam, me pynjot, ki san ngut ki khun jong nga, ka kmie ki khun bad ma nga, ngin sa iap thngan baroh shisnem lynter. U Hati sawkuna, tang shu iohsngew ia kane ka jingkren jong u Nongrep, u ieng shiphang, nangta u pynieng ia u Luta, u pah laisien laiwat bad u phetnoh bak sha ‘lawbah ‘lawsan da kaba jynrat naphang ia kaba wit ha ka lynti iaid jong u.
Ki Hati ki long ki mrad kiba stad bad kiba don ka bor sngewthuh (Sencitive). Une u Nongrep u la ia tyngkhuh bun bun sien bad ki Hati, u ong “Shisien katba u dangiaid lynti na shnong Pohlarat sha Umtyrtah (Hot spring), kyndit kynsan u la ia kynduh ngong ia shi kynhun ki Hati bhur (a group of Elelephants) ha kawei ka lawbniap. U Nongrep namar ba ym don diengbah ba un kiew, u la shu buriehnoh ialade hapoh kawei ka Sanium ‘langmet. Ki Hati ki don ka bor ban sngewthuh, ban sma, ki tang shu wan hajan kata ka Sanium ‘langmet barieh u nongrep, ki pynieng iala ki Luta shajrong, ki kynrandien kum ban ailad ia u Nongrepban mih bad phet na kata ka jaka Sanium ‘langmet.
Kane ka jingailad jong ki Hati, u Nongrep u la mih na kata ka Sanium ‘langmet bad kiew halor dieng, nalor dieng u la ioh ia kita ki Hati kiba iaker tawiar ( ker sawdong) ia uwei u Hati uba thiah lukdui ha madan na ka jingmynsaw ki kjat ba u hap ha ka thliew maw. U Nongrep u la iohi kyndiang ba kita ki Hati da ki Luta jong ki, ki la tynrong na kpoh u Hati uba la mynsaw. Napdeng ki Hati don lai tylli ki Hati kiba khamheh, da u Luta ki wer ia ki Phlang, ki synrut ia ki sladieng bad ia kiwei de ki jaitphlang aiu re ki kyllan ha ki kjat jong uta u Hati uba la mynsaw, katba kiwei pat ki Hati, ki jynrat ia ki ‘lungsiej, ia ki diengkait, ia ki slasiej, sla skhen bad ki aibam ia uta u Hati uba la mynsaw, uba la shu thiah ban lukdui ha madan.
U Nongrep u la iohi ruh ba hapdeng ka kynhun don uba khamheh bad ki Hati naduh kiba heh haduh kiba rit ki kohnguh bad bud katba ialam lynti ma u. U Hati sawkuna pat um ju iakhlehlang bad ka kynhun, u iaid marwei. U Hati sawkuna u dei u Hati shynrang uba shah beh na ka kynhun da ki Hati shynrang (male Elephants).
Ki Hati ki long ki mrad kiba stad tam bad kiba don ka jingsngewthuh bad kiba tip ia ki briew ki babha bad ia kiba sniew bad kiba sngewthuh ia ki ktiensih bad ia ki ktien kiba donakor. Ia ki briew ki babha bad kiba ju kren donakor bad burom ia ki, ki Hati wat lada ki iaid lyngba ka pynthor kba ne ka lyngkha kba jong ki briew kiba bha kim pynsniew eiei ia ki jyngthung, ki jyngtep, hynrei ia kiba timsih timsang ia u (Hati) ki pynjot thiaw naphang. Ki Hati ha ka por sngi ki shongrieh ha ki ‘lawbah ‘lawsan katba ha ka por miet ki ju mih sha ki shnong jong ki briew ban wad mluh (for pint of salt).
Ki Hati lada jia ba ki kam ia ka wah ne iaid lyngba ka jaka ktieh, uwei pa uwei u Hati, ki kdiah ia ki tnatdieng, ki pynngam ha ktieh, ki kyrdem haduh ba ki tnatdieng kin ngam ha ktieh, nangta ki sa iaid bad pyniaid ia ki Hati rit ne ia ki khun Hati bad da kaba khynniat artat da ki Luta haduh ba kin da lait sha shiliang.
Nangta lada jia ba iap uwei na ki Hati, ki kdiah ia ki tnatdieng, ki khlong ia ka khyndew bad ki tap ia ka met jong uta u Hati uba la iap. Lada jia ba iap uba la don bniat ( Trunk) ki sei ia ki bniat jong u bad ki leit bret sha um lane tep shapoh ktieh, pynkut u Nongrep uba la pyrshang ban buddien ia ka jingim jong ki Hati.