Ym shah ka Balang Jaiaw ban leit rung lum jingtep

Shillong, 15 Jymmang:
Ka Balang Jaiaw ka la bthah ia u nongap ka lum jingtep ba u dei ban husiar ban nym shah ioh don ki briew ba wan ban rung ha lum jingtep hadien ba la mih ki khubor  ha kine ki sngi ba don ki briew kiba leit pynlong jingmane ksuid ha ki lum jingtep ha ki jaka ba don ha kane ka nongbah.
Haba iakren bad u nongpeit ia ka lum jingtep ka Balang Jaiaw, u Bah EUS Lyttan u la ong ba la bthah ia u nongap ka lum jingtep ba un husiar ioh don ki briew ba thmu ban rung bym dei ban shah khamtam ha ka por mynmiet.
Ka Balang Jaiaw ka don ka lum jingtep ha Jaiaw Weiking kaba la pyndonkam ban tep tang ia ki nongsharai balang, ym ia ki riew paidbah.
Namar kane ka jingmih ka khubor mane ksuid ha ki lum, bun ki Balang ki la kyrpad ia ki para bangeit ba kin long kiba husiar ban nym ngop ha kane ka jingialam bakla. Ki kmie ki kpa, kiba haiing hasem jong ki samla khamtam ki khynnah skul, ba kin peitngor bha ia ki khun jongki, ki samla.