Nongstoiñ: Ka ophis jong u District Sport Officer ka West Khasi Hills Nongstoiñ, ha ka sngi Saitjaiñ jong ka taïew bala lah kala ïoh ban pynhap pyrda noh ia ka lynpung kynjatbol jong ki skul kaba la tip ruh kum ka West Khasi Hills District Level Inter – School Subroto Cup Football Tournament 2019.
Ia katei ka lympung la wan ban pynhap pyrda noh da u MDC ka Nongstoiñ Constituency u bah Gabriel Wahlang u bala long kum u kongsan, ha ryngkat ka jingiadonlang ruh u bah P.B. War Nongbri DSO ka WKH, u bah Mt. Gordon Marngar GS ka NDSA, ki nonghikai, ki kmie ki kpa bad kiwei kiwei kiba la shah khot sngewbha.
Haba phai sha katei ka jingiakhun phainal kaba la long ha ka madan ialehkai jong ka NDSA ha Nongpyndeng kala long shisha kaba shongshit shong shngain bha ha kaba la sakhi ruh ia kiba bun ki paidbah jong ka thain naduh ki hep kiba rit haduh kiba la san la rangbah kila wan ban sakhia ia katei ka jingiakhun phainal.
Shuh shuh ha ka jingiakhun ia ka phainal hapdeng kiba hapoh ka 14 snem jong ki shynrang kaba la long hapdeng ka Joel Gatphoh Memorial Sec School pyrshah ia ka Dapboklang Giri Memorial Sec School Porla kala long ka jingiakhun kaba noh shiliang ha kaba ka skul Joel Gatphoh kala lah ban pynliem noh ia ka Dapboklang Giri da 4 kol la 1 kol.
Haba phai pat sha ka jingiakhun jong kiba hapoh ka 17 snem kata ha baroh ar kynthei bad shynrang kala long shiahs ka jingiakhun kaba itynnad haduh katta katta bad ha ka jingiakhun jong ki kynthei ka Joel Gatphoh Memorial Sec School kala ioh ban khur ia ka nam lahduh da kaba kala ioh ban pynliem noh ia ka DHS Roy da 2 kol la 0.
Ha ka liang jong ki khynnah shynrang pat ka COG Sec School kala ioh ban khur ia ka nam lahduh da kaba pynliem ia ka DHS Roy da 1 kol la 0.
Ha katei ka sngi u kongsan bad u DSO kila ioh ruh ban sam ia ki medal bad ia ki khusnam sha ki skul kiba la ioh ban khur ia ka nam lahduh bad kumjuh sha kiba la shah rem noh.
Phi don ban ong eiei?