Rah ka Mawtnum SC&SC ia ka nam lahduh ha ka phutbol ha Umdihar

Nongpoh: Ha kaba pynkut ia ka Inter Shnong Football Tournament 2019 ha Umdihar, ka Mawtnum Socio Cultural & Sport Club, ka la rah ia ka nam lahduh hadien ba ka la lah ban pynliem noh pyrshah ia ka Umsamlem Sport Club da 3-1 kol, ha ka jingiakhun phainal, kaba la long hynnin ka sngi Saitjain ha madan ialehkai ha Umdihar.
La sakhi ha katei ka sngi, da ka jingdon u Bah R. Sutnga, Officer rangbah ka tnad PWD Building, Shillong kum u kongsan, ha ryngkat ka jingiadonlang u Bah C. Lamare, Rangbah Shnong, u Samla Aibor Shadap, President ka Umdihar Sport Club lem bad kiwei ki riew rangbah jong katei ka thain.
Haba phai sha katei ka jingiakhun phainal, ka kylla step jong ka jingiakhun ka la kut da ka jingiakhaid kaba 1-1. Hynrei dei ha ka kylla miet jong ka jingiakhun, ki rangialehkai ka Mawtnum, ki la lah ban nion tyngeh pyrshah ia ki rangialehkai ka Umsamlem, tad haduh ba kin da iohthep sa 2 kol bad kaba la pynbiang pura ia ka kynhun ba kan pynliem da 3-1 bad rah syndon ia ka namlahduh ha katei ka lympung.
Ka Mawtnum SC&SC, kaba la ioh ban rah ia ka namlahduh, ka la khur ia ka song pisa kaba T. 10 hajar tyngka, katba ka Umsamlem SC, kaba la shah rem noh ha katei ka phainal, ka la ioh khung ia ka song pisa kaba 5 hajar tyngka.