Phet krad ka tnga jong U Sheikh ka Dubai, kyrpad U Sheikh ban pynphai noh ka Germany

Ka Princess Haya, kaba dei ka thei bhabriew, kaba jylluin lymphuin, ka la ngiah ka la jlep shoin ia u tnga jongka, uba don haduh 9 billion pound ka spah jongu, hynrei ka la iehnoh ia u Sheik Mohammed bin Rashid al-Maktoum, uba dei ruh u nongsynshar jong ka Dubai bad ka la rah lang bad ka, ia ka spah kaba £31million ban sdang ia ka jingim thymmai, ong ka khubor.

Ka Princess Haya, kam shym la paw pyrthei shuh naduh u bnai Rymphang 2019, hynrei la iathuh ba ka la phet bak sha Germany, ha ryngkat bad u khun jongka bad ka khun kynthei ruh kumjuh bad mynta ka la pan jaka rieh na Germany bad ka la pan ia pyllait sanshyieng na u tnga jongka.

U Sheikh, ula sngew kynjah palat ha kine ki sngi bad ula daw mynsiem marwei marwei bad la iathuh ba ula iakren bad ki nongsynshar ka Berlin, ba kin pynphai noh ia ka tnga jongu, kaba dang don 45 snem ka rta, U Zayed u khun shynrang, uba hynniew snem abd ka Al Jalila, ka khun kynthei kaba don 11 snem sha katei ka Ri jongu sha United Arab Emirates, hynrei la iathuh ba ka Berlin, ka kyntait ia katei ka jingdawa jong U Sheikh bad la iathuh ba ki pulit jong katei ka Ri, ki ai jingiada ia kitei ki shikmie shikhun.

Kham mynshwa, la iathuh ba U Sheikh, ula khie bitar ia ka tnga jongu, ha kaba ula thoh ha ka peij jongu ha instagram, da kaba ong “Pha ka riewkai, ka riew shet kylla” bad ula ong shuh shuh “Khie leit sha ka jaka, kaba pha ju ia bunkam borabor !!!!!!?”