Nongpoh: U Bah Toningstar Thangkhiew, uwei na ki rangbah Khasi na Jirang bad uba dei ruh u President ka Sengbhalang Islam Jirang Unit, u la ong ba ka Niam Islam, ka don ia ka thong kaba khraw na ka bynta ban pyniar ia ka Niam Islam ym tang ha katei ka thain Jirang, hynrei wat ha kiwei kiwei dei ki jaka ha Ri Bhoi.
Lah ruh ban kdew hangne, ba naduh ka por ba utei u rangbah, u la thaw ia katei ka kynhun Sengbhalang Islam ha Jirang, la mih shibun ki jingkynthoh ha ki Social Media bad kiba la saphriang ha ka Ri Khasi hi baroh kawei, la mih shibun ki jingiatai halor katei ka kynhun Sengbhalang Islam Jirang Unit.
Ha ka jingiakren bad U Rupang, u Bah Toningstar Thongkhiew, u la iathuh ba ha ki snem kiba mynshwa u dei u Khristan, hynrei mynta u la rung noh ialade sha ka Niam Islam bad u la ong ruh ba u la sngewskhem bha ia la ka jingngeit naduh ba u la rung sha katei ka Niam Islam, tad haduh ba un da long syndon u Nongialam jong ka Sengbhalang Islam Jirang Unit.
Khyndiat haba batai halor katei ka Sengbhalang Islam Jirang Unit, utei u Rangbah u la iathuh ba katei ka Unit hapoh Jirang, ka dei ka shnat treikam na Shillong bad kiba la ibit ia u ban long kum u nongialam ha katei ka thain Jirang.
Haba batai halor katei ka Sengbhalang Islam Jirang, utei u rangbah u la ong, ba ka jingthmu jong katei ka kynhun Sengbhalang, ka long ban iarap ia kito kiba duk ba jynjar bad kiba shem lanot, kata la ka long lyngba ki tiar ki tar bad ka Pisa ruh kumjuh bad kane ka long ruh kum shi bynta ban khring ia ki sha ka Niam Islam.
Haba kylli halor ka jingdon ki dkhot hapoh katei ka kynhun, utei u nongialam jong katei ka kynhun Sengbhalang Islam ha Jirang, u la iathuh ba ia mynta hi ki dang don tang kumba 20 haduh 30 ngut bad hapoh katei ka kynhun, la pdiang kyllumlang la ka long ia ki shynrang bad kynthei ruh kumjuh.
Shuh shuh, u la iathuh ruh ba katei ka kynhun Sengbhalang Islam Jirang, ka angnud eh ban don ia ka jong ka Skul bad Iingmane ym tang ha katei ka thain, hynrei wat ha kiwei kiwei de ki jaka.
Nalor kitei ki jingangnud, u la ong ruh ba ka Seng hi ka angnud ruh ban iarap ia kito ki longiing kiba duk bad kata ka long ban buh skul ia ki khun jong ki, ha kaba ka Seng ka angnud ruh ban phah pule ha ki jaka kiba kham biang bad kata ym hapoh ka jylla, hynrei kiba don shabar na ka jylla.
Haba iadei pat bad jingrung Niam Islam ki Khasi kiba sah ha katei ka thain, utei u Rangbah u la iathuh, ba ia mynta hi ka kiew bha, namar dang tang ha kine ki khyndiat snem ki don tang 4 ngut, hynrei mynta ki la don haduh 500 tam ei ei, ha kaba u da ong ruh ba mynta lei ka lah ban nangkiew ka jingwan rung Niam Islam ki Khasi kiba sah ha katei ka thain.
“Ia mynta ngi dang don tang kawei ka Masjid ka bym pat da shna bha ha shnong Umkhawai bad ha katei ka jaka, ngi ju pynlong kum ka jaka ban iakynduhlang hapdeng ki para Niam Islam” ong utei u Rangbah.
U la iathuh ruh, ba ki shnong kiba ka Niam Islam ka la sdang ban suhthied, ki kynthup ia ka shnong Patharkhmah, New Jirang, Old Jirang, Umsohbar, Umiong, Sohkyrbam bad ka Umkhawai, ha kaba u la khmieh lynti ruh ba kin sa don ki briew na kiwei pat ki shnong, ki ban sa rung sha katei ka Niam.
Haba jubab halor ka jingmih ka kyntien ba katei ka kynhun Sengbhalang Islam Jirang Unit, ka ju thong da ki Phew hajar bad Lak tyngka na ka bynta ban khring sha ka Niam Islam, utei u rangbah, u la ong ba kam don kaba kum kata ka jingthong tyngka kaba heh, hynrei kum ka Seng ka ai bad iarap ia kito kiba wan pan jingiarap, kata la ka long da ka pisa ne da ki tiar ki tar.
Ka jing rung Muslim ki khasi da ki spah ngut ha ka than Jirang ka long tang na Mar ba ioh ei ka Pisa kamdei ka jing rung ia ka niam ne ban ioh jing pynim lyngba ka niam hynrei ka ne ka niam ka hikai ioh ei ia Pisa kumta ka long ka bu ia ki duk ne jaituh trei tang ka wei nga don ban ong husiar ioh shahteh haka Pisa piah.