Kam Rangbah shnong u Nepali ha Umthe

Shillong,
14 Jymmang:
Ka AJYWO seng kmie, ka la leit buh da ka jingujor ha u Chief Executive Member jong ka Jaintia Hills Autonomous District Council halor ka jingkam Rang bah shnong u wei u khar Nepali ha ka shnong kaba la khot ka Umthe kaba hap hapoh u pud u sam jong ka Elaka Sutnga ka shnong kaba la shong la sah tang da ka Nepali suda.
Kat kum ki sakhi sa but kiba ka AJYWO ka la ioh, la lap ba utei u Nepali ia uba ym pat shym la ioh kyrteng satia u la kam Rangbah shnong ia lade bad u la nud ban ai syrnot jinglong trai shnong (Permanent Residential Certificate) ia u wei u Nepali u ba kwah ban applai ia ka kam shipai. “Ka long kaba lyngngoh ba kumno u Nepali u ba wan na kawei pat ka ri u nud ban kam Rangbah Shnong ia lade ha ka jaka kaba hap hapoh u pud u sam jong Jaintia Hills kaba hap hapoh ka jingkdup jong ka 6th scheduled jong ka Constitution jong ka ri India. Kane ka long kaba beain haduh katta katta kat kum ka United Khasi-Jaintia Hills Autonomous District (Appoitment and Succession of Chiefs & Headmen) Act, 1959.” Ong u Bah M H Dkhar President jong ka AJYWO Sengkmie.
Ka AJYWO ka la lap ruh lyngba ka RTI ba ka JHADC kam don jingtip eiei shaphang kata ka shnong Umthe ne ia u rangbah shnong jong ka, kumta ka seng ka la dawa na u CEM ban pynshitom ia utei u khar Nepali, ka la byrngem, ruh ba lada ka JHADc kam shimkhia ka seng kan leh ia kaba donkam.