U bah BM Lanong, u MDC shu sieh ka KHADC

Shillong: U Bah Bindo M Lanong na ka UDP ula shah thung kum u MDC shu sieh ne nominated sha ka KHADC.
Katkum ka khubor, na uwei u nongialam ka UDP haba iakren mynta ka sngi, la iathuh ba ka tnad District Council Affairs ka la pdiang ia ka kyrteng jong u bah Bindo myn hynnin ka sngi ban long kum u MDC shu sieh.
La iathuh ba kane ka jingthung ne sieh MDC ia u bah Bindo ka dei hadien ba ka UDP bad ka NPP ki la iapynbeit kham mynshwa ba ha KHADC dei ban ioh da ka UDP bad ha JHADC dei ban leit sha ka NPP.
U bah Bindo u dei u Senior Working President ka UDP bad u la long u MDC ha ki snem ba la dep nalor u la bat ruh kum u CEM ka KHADC nalor kiwei ki kam. U la long u myntri sorkar ruh.
U bah Bindo u dei uwei na ki nongialam seng riewlum ba satar bha bym ju kylla party haduh kine ki sngi hynrei u neh beit haka seng riewum.
Da kane ka jingsieh ia u bah Bindo, ka UDP ka don 8 ngut ki MDC ha ka iing dorbar kaba 30 ngut ki MDC.