Ym donkam ban siew khajna ia u synsar

Ka sorkar Jylla, ka la rai ban weng noh ia ka khajna na ka bynta u synsar bad ka la dei ha kajuh ka por, ba kan pyntip la katno ka don ka khajna, kaba ju shim na utei u mar khlaw haduh ha kine ki sngi, lada dei na ka tnat khlaw jong ka sorkar Jylla, ne na ki ophis jong ki District Council, ki dorbar shnong bad kumta ter ter.
Ki don bun kiba sngew iahap, ia katei ka jing pynduh ia katei ka khajna ia u synsar, hynrei ka mat kaba kongsan eh, ka long la ka dang iahap ne em ban rep synsar ha kine ki sngi ki ban sa wan, namar la ju tip, ba u synsar, u dei uba pyn tyrkhong ia ka khyndew bad uba bam duh ia kiwei pat ki jingthung jingtep.
Sa kawei pat ka mat, ka long ba lada phi weng noh ia ka khajna ia u synsar ruh, hynrei ka mih sa kawei pat ka mat, la phi lah ne em ban buh sa ia ka dor kyrshan lane kata kaba ki ong minimum support price, na ka bynta utei u jingthung, namar ba ka iew jongu, ka tyllun khlem thikna, ha kaba teng teng u kiewdor palat pud bad teng teng u hiar dor palat pud bad katei ka buh jingeh ia kito kiba ju mlien ban rep synsar, ba kin bteng ia katei ka kam bad lada ka sorkar, ka sngew donkam ban pynim ia ki nongrep synsar, ka donkam da ka dor kyrshan ia utei u mar.
Kam dei tang katta, ngi tip shai ba u synsar, u dei uba la ju pyn donkam ha kaba sar iing sar sem bad lada ka long kumta, balei ba ka sorkar Jylla, kam shna hi noh ia la ka jong ka karkhana shna synsar, ban nym ia kit shuh sha kiwei pat ki Jylla; hynrei ban shna syndon haduh ba un da dep bad ban die sha ki briew kiba pyn donkam ha ka Jylla ne shabar ruh.
Ka jingkhein haduh mynta kam shai, ba lada u nong Meghalaya, u don da ki 20,30 lak ngut bad nangta lada don tang san lak tylli ki longiing, kumta ka dei ban don ka jing pynshlur ia ki nongrep, ha kaba kawei pa kawei ka longiing, kan pyndonkam da u synsar lajong bad lada ka long kumta ka pyni, ba ka jingdonkam synsar, kan long da ki spah lak song ha ka shisnem.
Ka jingmut namarkata ka shai bha, ba ka jingiarap ia ka rep synsar, kam thew tang ban weng ia ka khajna, hynrei ka donkam eh, ia ka iew ka hat bad lada shim khajna, kumba shim ia u dewiong, mawshun bad kiwei ruh sa lei, haba ka bha pat ka iew ka hat. [rms]