Na Tura, pur ka khana mane ksuid sha Khasi Hills

Shillong, 12 Jymmang:
Hadien ka khana ba la don ki briew ba mane ksuid ha thain Tura ka West Garo Hills, mynta sa ka khana ka la pur shane sha East Khasi Hills ha kaba la iathuh ba don ki briew kiba pynlong mane ksuid ha ki lum jingtep kiba don ha kane ka nongbah.
Na ka liang u De puty Commissioner ka East Khasi Hills u Sanjay Goel u la shim khia ia kane ha kaba u la pan ia ka jingiatreilang jong ki bor shnong, ki bor kynhun niam.
“Ngi la thoh sha ki bor synshar shnong bad ki nongsharai Balang ba kin iatreilang halor kane ka kam ban pynneh ia ka ain namar kane ka jingmih ka khubor”, la ong u Goyal.
U DC u sngew ba kane ka jingmih ka dei ka kam jong ka imlang sahlang bad donkam ban iatreilang ban tem ia ka. “Ngi kwah ban sngewthuh ia kane ka kam bad ngi pan ia ka jingiatreilang jong ki bor shnong, ki bor Balang ban phah ia ka khubor sha ka imlang sahlang ba ka bor synshar district ka don”, la ong u DC.
Ha kajuh ka por, u la iathuh ba la kyrpad ia ki bor shnong, ki bor balang ba kin peitngor ia kane ka jingjia khamtam ki jaka ba don ki lum jingtep. U la ong ba haduh mynta, ym pat ioh jingujor eiei hynrei lah ban dei ba ki briew kiba la tip ruh kim wan ban ai ia ka jingujor.
U la ong ba ka jingtip na ki paidbah khamtam ha kum kane ka kam, ka long kaba donkam, u DC u la ong ba ki bor shnong bad ki longing ne ki Balang ki dei ban iatreilang bad ka bor synshar district halor  kane ka kam. U la ong ba kum kane ka jingleh ka lah ban don ka jingktah ia ka imlang sahlang.