40pc, kiba leit trei ha West K Hills, ong ka HNLC

Shillong, 12 Jymmang:
Ka HNLC, ka pyn shai mynta ka sngi, ba ka rai jongka, ban khang ia ki ophis sorkar, ha ka 8, 9, 12 bad 13tarik Jymmang 2014, ka dei ban pyrshah halor ka jingsngew pyr shah jongka, ia ka jingkem briew jong ki pulit ia ki nongialam jong ki sengbha lang, halor kata ka jingkyn noh, ba ki dei kiba donkti bad ka Council.
La ong shuh shuh, ba ka jingkem ia utei u nongialam sengbhalang bad ia 4ngut kiwei pat, ka dei kabala don da ka jingthmu bad la iathuh ba haduh mynta, ki pulit, kim shym la ioh ia kano kano ka jingpyn shisha, ba utei u nongialam sengbhalang,u donkti bad ka Council.
Ki pulit kham mynshwa, ki kam, ba utei u nongialam, u dang shu wan phai na Bangladesh, ha ka 11tarik Jymmang bad la iathuh ruh, ba u leit ban ai pisa sha ki nongialam jong ka Council sha Bangladesh bad katei ka jingmih khubor, kam shai, la ka dei kaba u dang leit, ne ula wan phai na Bangladesh.
La ong shuh shuh, ba lada jia ba u dang shu wan phai na Bangladesh, kumno ka pisa, ka dang don ha ka met jongu bad ba un rah ruh ia ki shithi, kiba la rim jong ka Council.
Ka HNLC, ka kam ruh, ba ki don ki nongthoh khubor, kiba la shah maham ha ki pulit, ba kim dei ban ai ki jingthoh kiba dei hok, halor ka jingleit trei jong ki nongtrei sorkar bad la iathuh ba kiba bun ki ophis sorkar Jylla bad jong ka sorkar India, la lap, ba ki ophis ki plie, hynrei ki shuki ki shu shong thylli. La kynnoh shuh shuh, ba ki don ruh ki nongthoh khubor, kiba la shah maham ha ki pulit, ba kim dei shuh ban dang pynmih ia kino kino ki khubor, kiba la phah da ka HNLC.
Ka Council, ka shim, ba ka jingkhein jongka, ka long ba ki don 45 haduh 55 percent kiba kyrshan ia ka Council, ha ka jingkhot sangeh leit rei jongka bad ha West Khasi Hills, ka long 40 percent kiba leit trei. La ong shuh shuh da ka HNLC, ba ka jingtohkit jong ki pulit haduh 14sngi, ka dei ba kin pyndik, kin pynkohnguh jubor, ia u ba un ai ki jingtip, kiba long beain bad kiba thok suda, ong ka kyrwoh na U  bah  Saiñkupar Nongtraw Publicity Secretary,HNLC.
Kiwei ki lad khubor, ki iathuh shuh shuh, ba ka kad khaii dewiong ha Dawki, ruh, ka khang ha kine ki sngi, ba ka don ka jingpakhang ophis jong ka HNLC.