Pyni paidbah, ki ehrang ia 200ngut ki hep rit “shah rah bor”

Ki khynnah skul, kiba la shah rahbor, ha ki ehrang Muslim, kiba kyrteng Boko Haram, la pyni paidbah, lyngba ka dur video.
Katei ka seng leh noh, ka iathuh ba la pyn kylla niam Muslim lut ruh ia kitei kiba shah kem bad la pyni ruh, ba la tap jain na khlieh jongki, kaba dei ka dak, kaba ki la kylla niam Muslim.
U nongialam jong katei ka kynhun, u ong shuh shuh, ba yn pyllait ia kitei ki lehnoh, lada la pyllait ruh ia ki lehnoh, kiba la shah set phatok.
La pyni, ha katei ka dur, ia kumba 100ngut ki khynnah, kiba don ha katei ka dur video, hadien ba U Lat jong katei ka Jylla ha Nigeria, u iathuh ba ula ioh jingtip, ia ka jaka, ba la set ia ki katto katne ngut na kitei. U Kashim Shettima, U Lat jong ka Borno, u iathuh, ba ula ioh khubor, ba la don ki jaka, ba la iohi, ia kitei ki khynnah bad ba ia katei ka jingtip, la phah sha ki bor shipai, ba kin leh ia kaba donkam.
Katei ka seng ehrang,  Boko Haram, ka la rahbor ia 276ngut ki khynnah kynthei, kiba dang don ha ki jingialeh eksamin jongki, ha ka skul, kaba hap ha ka Jylla Borno, ha ka shnong Chibok, ha ka 14tarik Iaiong bad ki don na ki, kiba la lait ban phet krad, katba sa 200ngut ki dang don ha ka jingshah set jong kitei ki ehrang.