“Ka jingieit spah”

AIS Suja

Ka jingieit spah ka dei ka jinglong jong u briew. Ka spah ka long kaba donkam ia uno uno u briew ne ka briew, namar khlem ka spah (pisa) ym poi shano shano ha kane ka pyrthei shai. Ha ki por barim bajah ki briew kim pat tip ia ka spah ne ka pisa hynrei ki pyndonkam da ki tiar (materials) ban iapein (exchange) ia ki jingdonkam. Don kiba kwah khaw ki ia kylliang da ka shriew, don kiba kwah shriew, ki ai da u khaw, kumta ter ter.
Katba ki snem ki nangiaid ki briew ki la nang ban pyndonkam ia ka spah bad ki da ia beh eh ia ka haduh kine ki sngi. Kumta kum ha kane ka pateng ka juk ba beh spah, ka ktien u Blei ka don ei ei ban kren halor kata da kaba maham ia ki briew shaphang ka spah da kaba ong – “Hynrei kita kiba kwah eh ban riewspah, ki hap sha ka jingpynshoi bad jingriam, bad sha ki bun ki jingkwah brai kiba biej bad kiba sniew kiba pynjyllop ia ki briew sha ka jingjot bad jingkordit, namar u thied ki kynja basniew baroh long kaba ieit sbai”. 1 Thimothy 6:8-10. U thied ki jingsniew baroh long kaba ieit spah, ieit pisa tyngka, namar ka pyllong kynrad ia ka spah, ym ka shakri. Haba ka spah ka la kylla long ka kynrad u briew, ym tip shuh ia u Blei u briew, um sheptieng ia u Blei um burom ia u parabriew. Kumta ka wallam ia ki jingsniew bad jingjah burom, bad ka ialam ia u briew sha ka jingjot.
Dei na kata ka daw ka ong ka ktien u Blei – “To sumar, to kiar, na ka jingkwah lalot: namar ka jingim u briew kam shong satia ha ka jingdap kyrhai jong kiei kiei kiba u don” Loukas 12:15.
Kawei ka jingeh ha u briew dei ka jinglalot. U briew um hun ha kiei kaba u don ne u ioh, hynrei u kwah ioh shibun bad ban tam ia kiwei ne kham halor ia kiwei, bad kim sngewthuh ba kane ka rukom kum kane ka dei ka Formula jong u soitan, namar u soitan u kwah ban long most high ban ia kiwei pat ki para angel bad tam ia u Blei. Kumno ka ktien u Blei ka ong halor kane? “To sngew hun ruh bad la ka bainong. Loukas 3:14. To sngew hun kaei ba phi don. U briew te um sngewhun. Bad kane ka jingbymhun ka pyllong ia u briew ban leh jubor ban shim klop bad ban thom ia ka sang ka ma. Ka jingbymhun, bad ka jing lalot, ka pynpyrkhat ia u briew ne ka briew ban leh wat ia ki kam jah burom kam awria baroh. Ha ka por u Jisu hangne ha pyrthei, ki Nongkhrong (Tax collector) ki la wan ba yn ioh pynbaptis ia ki, bad ki la ong ha u Jisu – Ko Nonghikai, Aiu ngi dei ban leh? U Jisu, u ong ha ki – Wat khrong tam ia kaba la buh ia phi” Loukas 3:12-13. Ki shipai ruh kumjuh hi ki la kylli ia u Jisu, ki ong – “Ngi pat ngi dei ban leh aiu? U Jisu u ong ha ki – “wat leh jubor iano iano ruh. Lymne wat shim klop ei ei: To sngew hun ruh bad la ka bainong” Loukas 3:14.
Ngi iohi ba ha kine ki sngi ne juk ba u briew um don jinghun, um hun ruh ha kaei kaba u la don lypa hynrei ki kwah ia ka jinglalot spah. Ka jinglalot spah ka long ka pop. Namar ynda haba u briew u ioh ia ka, u sngew ba ka pyrthei ka dei ka jong u, um tieng ia u Blei um burom ia u briew, bad lada un duh ia ka un thom ia ka sang ka ma tang ban ioh ia ka namar um hun u don ka jinglalot. Dei na kata ka daw hap aiti ha u Blei ha ka jingduwai da kaba kylli kumba ki Nongkhrong bad ki shipai hyndai ki kylli ha u Jisu – “Aiu ngi dei ban leh” ba u Blei un ai ka jubab kaba biang. U Jisu u ong – “Ka jingim ka KHAM KOR ia ka jingbam bad ka met ia ka jain kup” ka mut ba ka mynsiem u briew ka kham kor ban ia kiei kiei ki jong ka pyrthei.
U Jisu u ong – “Naba u briew un myntoi aiu lada un ioh ia ka pyrthei baroh, hynrei un duh noh ia la ka mynsiem? Mathaios 16:26. Kam myntoi ba u briew un long uba riewspah tam hynrei um ithuh pat ia ka jingieit bah u Blei. “Lane u briew un ia plie daei ia la ka mynsiem? Mathaios 16:26. Ym don spah ban ia plie ban thied ne die ia ka mynsiem u briew, Ka long kaba rem dor, ka long kaba na u Blei uba la thaw ia ka.
Na kata ka daw u Blei u khang pyrshah ban ieit spah palat ne ban lalot namar yn myntoi aiu? U briew u wan thylli u leit thylli na ka pyrthei khlem rah shi damli ruh nangne na pyrthei. Kane ka dei ka jinghikai ka ktien u Blei kein. U Blei um khang ba u briew un ioh spah, hynrei u briew pat u dei ban nang ia ki ain u Blei, ba kata kaba ieit spah palat bad ka jingkhwan lalot ka long ka pop shyrkhei. U Blei u kyrkhu ha kiba tip ban pyndonkam ia ka, hynrei ka long ka jingtim ha kita kiba sarong. Ki Phawer u Aesop ka ong uba duk u tharai ba un suk ynda u la riewspah hynrei ka pat ka don la ka jingpynpisa, ia kaba uba duk um tip ei ei. Kaba mut ba ym don ka jingsuk ia u briew. Hynrei ka jingsuk ka long tang ynda u briew u sngewthuh ia u Blei bad ka ktien jong u. Namar ka mynsiem u briew ka long kaba remdor kaba kordor ha khmat u Blei, ym ka spah. “Ka jingim u briew kam shong satia ha ka jingdap kyrhai jong kiei kiei ba u don” A Man’s life does not consist in the abundance of his possession” Loukas 12:15.
Na kata ka daw, u Blei u khot ia ki briew sha ka jingkylla kaba mut. Ki kam ki Apostol 17:30-31. Ka daw ka long ba u briew un phai, un sngewthuh ia ka jingkordor ka jingim briew ne ka mynsiem briew, namar ym don uba lah ban bat ia ka mynsiem briew lait na u Blei uba la thaw ia ka. Ka Kitab u Eklesiastis ka ong – “Ym don u briew uba donbor halor ka mynsiem ban bat ia ka mynsiem, lymne uba donbor halor ka sngi ka jingiap” Eklesiastis 8:8. Dei halor kane ka nongrim ba u Blei um kwah ban ki briew kin pynlut ia ki rta jong ki ha ka spah bad ka jingkwah lalot spah, hynrei ban ithuh ia u Trai ka long kaba KORDOR TAM IA U BRIEW” Jeremaiah 9:23- 24.