Rakhe ia ka Sngi Thomas Jones ha Lumparing

Shillong:Ban rakhe ia ka Sngi U Thomas Jones 2019, myn hynnin ka sngi ka Thomas Jones Memorial School ha Lumparing, ka la pynlong ia ka jingpynkup burom ia ki khynnah kiba pass ia ka Eksamin SSLC 2019 bad ia i Nazreen Nongdhar iwei i khynnah jong kane ka skul iba la ioh ia ka jingithuh kum ka ‘best defender’ ha ka Hero Sub-Junior Girls National Football Championship kaba la long ha Odisha mynta u snem. Ha kajuh ka por ruh la ioh ia ka jingkren na ka Prof Streamlet Dkhar, Dean of Humanities, NEHU halor ka jingnoh synniang jong u Thomas Jones kum u nongprat lynti ha ka thoh ka tar Khasi. Kiba la ia don ha kane ka jingrakhe ki long ki Seng Longkmie jong ka Lumsohphoh, Lumdorbar bad Lumparing Rum ryngkat ki kmie ki kpa bad ki nongkyrshan jong ka Skul.

Ki khynnah skul ruh ki la iashim bynta lyngba ki jingialehkai drama bad ki jingrwai. La ioh ruh ban pyni ia ka phlim KA NABON na ka bynta ki khynnah skul bad ki kmie ki kpa.