U Rev Thomas Jones: U Kpa ki Alphabet Khasi bad u synniang ha ka Balang

Bah Prophesor Mawkon, Nongjri Pynursla, East Khasi Hills District, Meghalaya.

U Rev. Thomas Jones & ka kurim i Mrs. Anne Jones ki la mih na Liverpool ha ka 25.11.1840. Bad u la wan poi ha Sohra ha ka 22.6.1841. La pdiang sngewbha ïa u Thomas Jones da uwei u Rangbah Shipai ba riewblei uba la ai jaka sah ïa ki, une u dei u Captain Lewin. Ha u snem 1842 u la pynkhreh nyngkong ïa ka kot kaba u ai kyrteng “ Ka Kot Pule Khasi A-B.” U la pynmih ruh 2 tylli ki kot Niam. U la seng 3 tylli ki skul rit ha Thain Sohra ha Mawsmai, Mawmluh bad ha Sohra. Ka Mrs. Anne Jones ka la khlad ha ka 22.08.1845 bad la tep ha u Lum Jingtep ka Balang ha Nongsawlia (Sohra). U Thomas Jones u pynkylla khasi ïa ka Gospel u Mathaios kaba u la ai kyrteng Ka Gospel u Mathi ha u snem 1846. U Thomas Jones u la khlad ha Kolkata ha ka 16.09.1849. La seng ïa ka Balang kaba nyngkong ha RI KHASI JAINTIA ha NONGSAWLIA ha ka 8th March 1846 ha kaba la pynbaptis ïa ki Khristan banyngkong eh, U AMOR BAD U RUJON. La pynbaptis sa lai ngut kiwei pat ki khasi kita ki long U Tira Sing, U Luh & U Ramjan. La pynbaptis ïa ka Nabon Sawian ha ka 16th July 1848, ka kynthei ba nyngkong eh ban pdiang ïa U Trai Jisu. La pynbaptis ïa ka Bir, ka Phuh bad U Jarkha ha ka snem 1849. Ka Bir ka la khlad noh ha kane ka snem 1849 bad ka la kylla long ka Kynthei ba Nyngkong eh ban tep don burom da ka rukom Tep Khristan. Ha une u juh u snem 1849 la pynbaptis ïa U Larsing Khongwir bad la thung ïa U Tymmen Basan ba nyngkong eh jong ka Balang Nongsawlia bad baroh kawei ka Ri Khasi Jaintia kata U Tymmen Basan Tira Sing. La pyndep ïa ka Jingïathoh Shongkurim khristan kaba nyngkong eh hapdeng U Luh bad ka Phuh. La pynlong ïa ka Jingïaseng Presbytery kaba nyngkong eh ha Nongsawlia ha ka jinglong Moderator U Rev. Thomas Jones II bad U Rev. Griffith Hughs kum U Secretary.

Katto katne ka jingïapher hapdeng U THOMAS JONES bad U HARRY INGLISH.

U REV. THOMAS JONES u la aiti ïa la ka jingim ban ïada ïa ka Jaitbynriew Khasi baieid jong ngi na ka jingbanbein ka Sorkar Phareng bad NongkhaIii Dohlieh da kaba seng Skul, ai ïa ki Alphabet Khasi ABKD, hikai ruh ha kaba kyntiew ïa ka ïoh ka kot. Na ka bynta kane u la shah banbein ha ka bor synshar Dohlieh haduh ba u hap phet ïap noh sha Kalkata bad ka Jingpang ka la lap ïa U bad u la khlad ha Kalkata ha ka 16th September1849 ha Scottish Burial Ground, Karaya Road, Kolkata.

U HARRY INGLISH u dei Ophisar Sorkar Dohlieh uba bat ïa ka kyrdan Asst. Political Agent uba bamsap bad lehbein bha ïa ki Khasi. Ha ka kam KhaIii Pateng u lehbor bha ïa ki Khasi da kaba pynbor ban die ha ka Company jong u kaba u ai Kyrteng Inglish & Company bad u kpa jong u (George Inglish) ha ka dor ban ïohnong ïa lade. U la leh donbor ruh ïa ki Bri Sohniamtra jong ki Khasi ha kato ka por. Kiba ialeh pyrshah ïa u, ki shah kem bad set phatok.