Pyllait ki pulit ia ka samla 17 snem ba ia phet rieh bad u samla

Jowai: Hadien ka jingioh pyllait ia ki ar ngut ki thei samla lud 14 bad 15 snem na Umpleng (cement area) East Jaintia Hills, mynta ka sngi pat ki pulit ka West Jaintia Hills lyngba ka tnad pulit kynthei hapoh ka jingialam ka kong B Shadap, ki la ioh ban pyllait sa kawei pat ka khynnah 17 snem ka rta kaba la phet ban ia kynduh ia u samla ba ieid jong ka uba sah ha Sohryngkham East Khasi Hills.
Katkum u SP ka West Jaintia Hills, u sahep Lakador Syiem, u la iathuh ba ka kmie jong katei ka khynnah, na Mynska ka la wan ban ujor halor ka jingjahrngai ka khun jong ka. Na ka liang ki pulit hadien ba ki la ioh ia kane ka jingujor ki la pynlong ia ka jingtohkit ban lap dien ia ka bad ha ka jingtohkit la lap ba ka don ha Sohryngkham bad ki pulit ki la hiar wut wut ban leit shimti ia ka na kawei ka iing kaba don ha Sohryngkham.
Na ka liang u SP u la iathuh ba ia katei ka khynnah la dep ban phah eksamin ha ki Doctor bad ym pat shym la ioh ia ka report.
“Lada ka report na ki Doctor ka pyni ba ki don ki dak ki shin kiba be-ain ngin hap ban leh ia kaba donkam katkum ka POCSO Act”, la ong u heh pulit uba peit ia kum kine ki kes.