Bah RM Shabong
Baroh ki ia kwah ban kynriah ia ki khar metor na iew mawlong sha kawei pat ka jaka bad hangne ngi iohi ia ka seng NPP, UDP, Congress, HSPDP bad ki sengbhalang ruh ki don ia katei kajuh ka jingmut, hynrei ka wan ka phang, kaba hap ban iakren bad kata ka long ba kumno ka sorkar Punjab lane ka seng Congress, kaba synshar ha katei ka Jylla, ka da lushia tasam ia ka synshar khadar jong ka sorkar Meghalaya.
U nongialam jong ka sorkar Punjab, uba dei u kapten shipai bad uba dei ruh u kha heh jong ka seng Congress, ngim tip, la ula kylli jingmut ne em halor kane ka phang, na ki paralok jongu, kiba don ha katei ka seng, ha shwa ba un tyrwa ban bei tyngka sha ki kharmetor ha Iew Mawlong, ba un phah ia ka kynhun sorkar, ban wan peit ia katei ka them metor bad kumta ter ter bad katei ka pyni, kumba U Singh jong ka Punjab, um shaniah satia ia ka sorkar NPP ha Meghalaya bad dei na katei ka daw, ba u pyneh horkit hordang ban kynriah ia ki khar metor na katei ka jaka.
Ngi im ha ka synshar paidbah bad ngi sngewthuh shai, ba u myntri rangbah ka Punjab, u da sngewthuh bha ba ka sorkar Jylla, ka don la ka jong ka hok, la ka jong ka iktiar bad wat ka sorkar India, ka don la ka jong ka bynta bad la ki jong ki ain, hynrei lada ka sorkar Punjab pat kam hun hi tdot, halor ka jingshakri jong ka sorkar Meghalaya, ia kitei ki kharmetor, kumta ka long ka mat kaba da eh than ban pyrkhat bad lehse, ka pynpaw ba U Singh ka Punjab, u kwah ban pynthut ia kane ka sorkar bym dei Congress lane ioh lehse u kwah pynban, ba un synshar hi noh ia kitei ki para doh para snam jongu.
Na kaei kaba paw ha kine ki sngi, ngi iohi, ba la pynpoi sha ka jingsngew jaitbynriew ia katei ka mat (wat la kam long satia kumta) bad katei ka daw, ka long namar ba ki paralok jongngi kiba na ka sorkar Punjab, ki la tuklar bad lushia palat ia katei ka sobjek, ha kaba la imat, kumba kim iahap, ia kano kano ka jingmut jong ka sorkar Jylla, hynrei ki shu kwah beit ba ka Meghalaya, kan pdiang ia kaei kaba ki kwah ki khar metor, lyngba ka jabieng kaba wan lut nadong shadong na Punjab.
Ka daw baroh dei naka sorkar jylla wat kynnoh ia kiwei pat. Balei lada ka sorkar jylla ka iaid laka kam mano ban saham tang shikyntien ruh? Dei namar ba ym don ba nud ban shim iaka rai naka liang ka sorkar jylla sa kurhuh sa ki sing briew na bar ruh.