Jowai: Ka Khasi Students Union Jaintia Hills District Unit myn hynnin ka sngi ka la leit ia kynduh ia u Deputy Commissioner, ka West Jaintia Hills District u Ma Garod LSN Dykes hapoh ka jingialam jong u General Secretary Samla Garland S Manner bad u Samla Shaniahskhem Dkhar Asst Finance Secretary bad kiwei kiwei ki nongialam ka Seng.
Kane ka jingleit kynduh ka Seng ia U DC, ka dei halor ka nongrim ban pynkynmaw biang ia u DC halor ka jaka talasi mynder, kaba don ha shnong Saphai bad Khanduli West Jaintia Hills bad ruh ban pan jingpynshai halor ka jingiaid shaphrang ka kam kaba iadei bad ka jaka talasi mynder, hapoh West Jaintia Hills
Haba pan jingpynshai na u tei u khliehduh jong ka District, u la ong ba na ka liang jong u, u la dep pynbeit ban ia shong jingialang bad ka District Task Force bad kiwei ki Department kiba dei peit ia kane ka kam ha ka 3tarik Naitung 2019, na ka bynta ban iakren ia katei ka phang.
U DC ula ong ruh ba u dang shu sdang trei dang ha kine ki shi sngi ar sngi, kumta um pat lah ban peit ia ki bui, kiba iadei bad katei ka kam bad kumta um pat lah ban batai bniah bha na haduh katno ka kam ka lah iaid shakhmat, hynrei hadien ka 3 tarik un sa lah ban batai kham shai iaka jong iaid beit ka kam.
Ha kaba iadei bad ka jingthmu tei ia ka jaka talasi mynder ha Khanduli, na ka liang u DC ula ong ba ka kam ka ladep nadong shadong khamtam ia ka jaka, hynrei kaba sah dei sa tang na ka Tourism Department, katba ka Saphai pat ula ong ba ia ka jingpynsngew paidbah, lah dep pynlong ha katei ka shnong bad na ka liang ki nongshong shnong ruh ki la pdiang bad mynjur ban tei ia ka jaka talasi mynder, hynrei ka ba dang sah ka long satang ka jingia pynbeit bad ki trai jaka.
Na ka liang u Samla Shaniah Dkhar ula ong “Ngi ban jur ia ka Sorkar ba ka dei ban pynstet iaka kam ha kaba iadei bad ka jingtei iaka Entry and Exit Point khnang ba ka jingthmu teh lakam ia ka jingwantuid ki mynder yn lah ban sdang noh mar mar”. Ka Seng ka la rai ruh ban buddien biang khah khah ia katei ka kam khamtam hadien ba ladep ka jingialang kaba la thmu ban pynlong ha ka 3tarik Naitung 2019 ia kaba la pynbeit hapdeng u DC bad ki tnad Sorkar baroh kiba don hapoh West Jaintia Hills.
“Ngi khmihlynti ba ka Sorkar ban ialeh ban pynstet kloi katba lah iakatei ka kam bad ngi banjur ruh ia u DC ban pynstet klo ikatba lah” la ong u samla Shaniah Dkhar.
Phi don ban ong eiei?