Shillong: Ka kynhun ba san ngut na Punjab ba la phah da u Myntri Rangbah ka jylla u Capt Amarinder Singh ka la wan poi ha ka nongbah Shillong hynnin ka janmiet ban pan jingshai na ka sorkar Meghalaya halor ka jinglong shngain jong ki briew Sikh kiba sah ha Them Iew Mawlong.
Ia kane ka kynhun la ialam da u myntri ka tnad Water Resources u Sukhbinder Singh Randhawa, kan iakynduh ia u Symbud Myntri Rangbah ka jylla u bah Prestone Tynsong bad ia u myntri kam pohiing u James PK Sangma mynta ka sngi Palei. Kiwei ki dkhot ha kane ka kynhun ki kynthup ia u Ravneet Singh Bittu bad u Jasbir Singh Gill kiba dei ki MP bad u Kuldeep Singh Vaid u MLA.
Haba kren sha ki lad pathai khubor myn hynnin ka janmiet, u Randhawa u la ong ba ki la wan mareh shane wut wut hadien ba u Myntri Rangbah ka jylla Punjab u sheptieng ioh ba ki Sikh kiba sah ha kane ka jylla kin shah pyndik kumba la jia ha Delhi ar sngi eiei mynta.
“Ngi kwah ban kyntu ia ka sorkar Meghalaya ban nym pynkynriah ia ki Sikh na Them Iewmawlong kiba la sah 150 snem eiei. Ka dei ka kamram ka sorkar jylla ban ai ka jingiada ia ki Sikh” la ong u Randhawa.
U la ong ba kim kwah ba kan wanrah ka jingsngew iapher tang namar kane ka kam watla ki don bun ki samla na Meghalaya kiba don sha Punjab.
“Ki Sikh kiba sah hangne kim dei ki poiwir. Ngi don kawei ka shnong ha Punjab ha kaba ym don uwei u briew u lah ban long trai. U briew uba sah ha kata ka jaka, u kylla long u trai jong ka jaka. Ki Sikh ki sah ha kata ka jaka da ki spah snem. Ngam ngeit ba ka long kaba dei ban kyndang ia ki na katei ka jaka. Ym don ba kwah ban phet na jaka sah” la ong kine ki nongialam na Punjab.
Ka KHNAM ka pynrem jur ia ka jingailad jong ka sorkar MDA ia ki bor bana bar ban Leit ban iuh kjat ha them iewmawlong kum ha kane ka por ka jinghuri hura bad ruh khamtam haba ka HLC kam pat dep ban punbiang ia ka report jong ka.
Haka 19 June 2019 haka por janmiet kine ki bor bana bar kiba kynthup ia ki MP bad ki MLA na Punjab ki la leit sha them iewmawlong ka jingkylli ka long ki Leit ban pynsngewthuh ne ki Leit ban ai mynsiem bad pynshit bad pynkhluid shuh shuh ia kane ka issue.
Phi don ban ong eiei?