Nongpoh: Kawei ka Sumo Gold kaba don ai u number ML 08 F 8521 bad kaba dei ka jong u Bah Ramkhilawan Sah u ba dei u ba trei hapoh ka Post Office, Nongpoh, hynnin ka miet ha ka por 12 baje ei ei mynmiet, ka la shah rongtuh ha ki runar ki bym shem la lah ban ithuh durkhmat, ha ka por ba ki dang pynieng ha phyllaw jong ka Post Office kaba don ha Nongpoh.
U trai jong katei ka kali, u la iathuh ba mar ia tip halor ka jingshah rong tuh, u la leit ban pyntip sha ki bor pulit bad ban thwet ia katei ka kali, hynrei khlem da lapdien shuh shaei ba ka don, pynban dei hynne ka janmiet ba ki katto katne ngut ki briew ki la iohi ba katei ka kali la pynieng harud surok na 13mer sha Killing bad kiba la pyntip sha ki Pulit ka Ri Bhoi bad kaba la pynlong ia u trai bad ki Pulit ba kin leit shim noh ia katei ka kali kaba la pynieng da ki runar ha katei ka jaka.
Haba batai halor katei ka jingshah rongtuh ia katei ka Sumo, u Bah Lin Nongbri, Post Master ka Nongpoh Post Office, u la iathuh ba kitei ki runar ki la pynpait haduh lai tylli ki tala heh, kiba la khang ia ka khyrdop jong kane ka post office bad hadien kata ki sa rongtuh ia katei ka sumo.
Shuh shuh, u la iathuh ruh hadien ba la shah rongtuh ia katei ka sumo, ki ki la hiar ban tohkit lyngba ki kor ringdur CCTV kiba don Toll Gate, Pahammawlein bad dei hangtei ba la iohi ba katei ka sumo ka la iaid lyngba jong katei ka Toll Gate ha ka por 1 baje ei ei mynmiet.
Haba iadei bad katei ka jingshah rongtuh ia katei ka sumo, ki bor pulit, ki dang pynlong ia ka jingtohkit kaba jur ban lapdien ia ki runar kiba la donkti ha ka ban rongtuh ia katei ka sumo na phyllaw ka Post Office kaba don ha Nongpoh.
Phi don ban ong eiei?