Ka jingpynkynriah ka long ban ai jaka ba kham biang, ong u bah Bindo, halor ki briew ba sah ha Them Iewmawlong

Shillong: Ka UDP ka la kyrshan ba dei ban pynkynriah ia ki briew ba sah ha them Iewmawlong sha ka jaka kaba kham biang bad kaba kylluid.
“Ka jingpynkynriah ka long ban buh sha jaka ba kham biang bad kham kylluid, ym ba leh bein ia ki”, la ong u senior president ka UDP u bah Bindo M Lanong haba kren mynta ka sngi sha ki lad pathai khubor mynta ka sngi.
U bah Bindo u la ong “Ngi la iakren mynshwa ia kane, ngi la ieng ha ka nongrim ba ym dei ba leh bein ia kito ba sah ha Them Iewmawlong ban kit shawei hynrei ka shu long ban leit sha jaka ba kham biang namar ba ka dei ka jaka iew, bad ka la khap ngiah bad ym don kano kano ka jingleh bein ia ki”.
Lah ban kdew ba ki jaitbynriew Sikh kila dawa na ka sorkar jylla ba dei ban pynneh beit ia ki ha katei ka jaka ba don mynta bad ban ailad ruh ba kin shna iing kiba bha namar ba kila sah naduh kumba 200 snem ha kane ka jaka.