Rem u kyrtong monlang ka MDA da kiwei ki daw, ym ba shah shet ki paralok:UDP

Shillong: Ka UDP ka la kyntait ba ka la shah shet ha ki paralok ka MDA ha ka jingshah rem ha kane ka elekshon MP ba la dep hynrei ka la kynnoh ba dei na ka jingshah ialam bakla ki paidbah ha ka jingber bih ka Congress da ka mat Citizenship Amendment Bill (CAB) bad ka jingiadei paralok bad ka BJP.
Ka jingialang ka Central Executive Committee (CEC) ka la iathir ia ka elekshon MP kaba la dep hadien ba u kyrtong ka MDA ba iakhun na ka shap ka UDP u Dr Jemino Mawthoh u la shah rem ha u kyrtong ka Congress bah Vincent H pala haduh 2 lak vote tam ha kane ka kynti.
“Ka jingshah rem jong u kyrtong ka MDA ka dei namar ba ki paidbah kila shah ialam bakla ha ka Congress kaba wanrah da ka mat CAB, ka bor pisa bad kiwei pat ki bor”, la ong u Senior Working President ka UDP u Bah Bindo M Lanong.
U bah Bindo u la ai nuksa kum ha Mawkyrwat konstitwensi ha kaba la mihkhmat da ka HSPDP, u kyrtong ka MDA u shah rem tang khyndiat bad baroh ki paralok naduh ka NPP, PDF bad HSPDP ki la iatrei shitom bha.
Kawei pat ka mat ba ka UDP ka iakren ka long ban pynlong ia ka General Council kaban jied ia ki nongkitkam thymmai ha u Nailur ban wan.