Ioh kem ki pulit ka Madhya Pradesh, ia 78ngut ki nong dawa pisa, bun kiba na Meghalaya

Indore: Ki pulit jong ka Madhya Pradesh, ki la ioh kem ia 78ngut ki briew kiba ju mlien ban thok bad dawa pisa na ki briew. Na kitei ki 78ngut, la thep phatok noh ia 75ngut bad kitei ki kynthup ruh ia 19ngut ki kynthei, katba sa 3ngut ki dei kiba dang don ha ka jing tohkit ki pulit, ong ka khubor.
La kem ia kitei ki 75ngut na kawei ka call centre ha Vijay Nagar, ha ka sngi hat majai. “Bun na kitei kiba shah kem, ki dei kiba na Nagaland bad na Meghalaya,” ong U Jitender Singh, Superintendent of Police.
La iathuh ba kitei ki briew, ki ju don kti ha kaba byrngem ia ki nong America, da kaba kam ba ki dei kiba trei kam kum ki pulit ha America bad ki ju kynnoh ba kitei ki dei ki briew, kiba donkti ha ki kam lute, kam thok pisa, ki kam khaii droks bad ki ju dawa pisa na kitei ha ka dor kaba heh bha. La iathuh ba kitei ki runar, ki don ia kumba shi million tylli ki jingtip kiba dei shaphang ki nong America bad ki ju phah da ki voice mesej. La kurup noh na kitei ia 100 tylli ki computer, 100 tylli ki mobile phone nalor kiwei pat ki tiar ba donkam.
Kitei kiba shah kem, ki kynthup ia U Javed, U Shahrukh bad Ud Bhaval, katba U Rahil bad U Sunny Chauhan, ki dang jah rngai, ong ki pulit.
U Rahil bad U Javed, kiba dei ki nong Ahmedabad, ki la plie ia katei ka call centre, la shisnem mynshwa, ong shuh ka khubor.