Kwah weng noh ki 8 tylli ki shnong na ka Nongpoh Town Committee

Shillong: Hadien ba la ioh jing ujor na ki phla tylli ki shnong jong ka Nongpoh Town Committee, U bah Paul Lyngdoh, EM in charge Town Dorbar, u la lum ia ka jingialang mynta ka sngi ban ia pynbeit halor kane.
Hapoh ka Nongpoh Town Committee (NTC) ki don 18 tylli ki shnong bad 8 tylli na kine ki la pynpaw lyngba ka jingujor sha ki bor jong ka Khasi Hills Autonomous District Council (KHADC) ba ki kwah ban weng noh ka jinglong dkhot na ka NTC.
Ka daw, la ong, ka dei ba kine ki shnong kim lah ban treikam bad ban bud kat kum ki kyndon jong ka Ain kaba iadei bad ka Town Committee 1960.
Kumta la rai ba ka tnad ba dei peit ia kane ka kam kan pynlong da ka jingjurip lane da kaba pynlong da ka Spot Assessment bad pule bniah ia ki dulir halor ka jingrung dkhot jong ki shnong.
Sa kawei ka jingai jingmut ka long ba ki 8 tylli ki shnong kin ai da ka jingthoh lane halor ka jingkwah jongki ban mih noh na ka NTC.
Ha kane ka jingialang la iadon lang ruh u MDC ka Nongpoh u bah Balajied Rani, u bah CB Syiem, chairman ka NTC, Secretary Raynold Kharkamni bad ki nongialam jong ki 8 tylli ki shnong.