Ka jingialang ki myntri sha man ki district, ban wanrah ka jingiajan

Shillong: Ka jingpynlong ia ka jingialang ka kynhun myntri (cabinet) shabar ka nongbah Shillong, ka long ban wanrah ia ka jingiajan ia ki kam ka sorkar sha ki paidbah bad ruh ban bishar ia ka jingiaid ki kam, la pynsngew ki myntri kane ka sorkar.
Haba kren halor kane ka jingpynlong jingialang ha Tura, u bah AL Hek uwei na ki myntri sorkar, u la ong ba kane ka jingialang ka long kaba seisoh bha bad kane kam dei tang ka jingialang ka kynhun myntri hynrei ka dei ka ruh shi bynta ban bishar ia ka jingiaid ki kam ban pynthikna ba kin poi sha ki paidbah.
“Ka dei ka jingialang kaba ai jingmyntoi bha bad ka dei ruh shi bynta ban bishar ia ka jingiaid ki kam. Nga ruh kum u myntri nga ju pyllong ia ka jingiabishar ia ki kam ha ka tnad ba nga peit”, la ong u bah Hek.
Katba u bah Banteidor Lyngdoh uba dei u myntri ka tnad ka rep ka riang, u la ong ba ka jingialang ha Tura ka long kaei kaei ka sngi ban pynsah jingkynmaw, ha kaba kane ka sorkar ka la shim khia.
“Ka jingialang ka long ban wanrah ia ka jingiajan sha ki paidbah bad kane ka sorkar ka la shim khia ban leit pyllong sa sha kiwei ki district bad ban pyniaid beit ki kam ki jam”, la ong u bah Banteidor.
Lah ban kdew ba kane ka sorkar MDA ba ialam u myntri rangbah u Conrad K Sangma ka la pyllong ia ka jingialang ka kynhun myntri ha sor Tura ha ka sien ba nyngkong naduh ba la ioh ia ka jylla Meghalaya.