Ka sorkar Jylla, ka nud ban shim ia ka rai kaba shlur, ia ka them Metor, kylli U Bah Adelbert Nongrum

Shillong: U Bah Adelbert Nongrum, MLA ka North Shillong, mynta ka sngi, ula ther tyngeh ia ka sorkar MDA, namar ba kam lah haduh mynta ruh ban pynbeit ia ka shong ka sah jong ki nongshong shnong ha Them Iew Mawlong.
“Ka la long shisnem tam, ba ka sorkar ka la kren halor kane ka mat, hynrei haduh mynta ruh kam pat lah ban leh eiei” ong U bah Nongrum, haba kren ha ki kotkhubor. Ula ong shuh shuh ba ka sorkar ka donkam ban shim ia ka rai kaba shlur, ban pynkynriah ia kitei ki nongshong shnong na Them Iew Mawlong.
U bah Adelbert, ula ong shuh shuh “Ki paidbah ki peit khuslai, ba ka sorkar kan pynbeit ia katei ka mat. Kan long kaba itynnad shi katdei, ban iohi ba kane ka sorkar, kan nud ban shim ia ka rai kaba shlur”.
U bah Adelbert, u ong ba um kwah ban don ka jingkhynra jubor ia ki, na katei ka jaka, ba ki don, hynrei ban pyn kynriah noh ia ki, na katei ka jaka sha kawei pat ka jaka ba kin sah bad ula ong ba ka sorkar, ka lah ban pyn donkam ia ka them Iew Mawlong, na bynta ka leit ka wan jong u paidbah.
U bah Nongrum, u kynthoh ruh ba balei ka sorkar Jylla, kam shym la thung lang ia u, ba un long u dkhot jong ka High Level Committee, namar ba u dei U MLA jong katei ka thain, katba ia kiwei pat ki MLA kiba na shabar, la pynrung ha katei ka komiti.