Shillong: Ka kynhun ialehkai phutbol ka Young Star FC (Shillong) ka la long ka lahduh da kaba pynliem ia ka Kharumnuid FC na Sohryngkham ha ka phainal jong ka IInd Mawutieng Invitation Football Tournament ba la pyniaid da ka Mawutieng Sports and Cultural Club ha madan Thohlyndit.
Ia kane ka lympung la wan ban pynhap pyrda da ka jingiadon lang i Sordar jong ka shnong Sohryngkham, President jong ka Sohryngkham Sports Club, Rangbah dong Mawutieng ryngkat bad ki riew rangbah jong ka shnong Sohryngkham.
Ha ka jingialehkai ba lah pynlong ha ka sngi saitjain, ka jingialehkai hapdeng kitei ki ar tylli ki kynhun kala long shisha kaba iakhaid bha wat la baroh arliang ki players ki la lah ban pyni ia la ki jong ki sap ban iohrah ia ka thong. Hapdeng ka jingiakhun dei ka Young Star FC kaba lah ioh ia ka lad ka kabu ban pynkhih jar nyngkong da u Wanlam Buam ha ka minit kaba 25.
Hapdeng ka jingkynhoi bad pynshit pynshngain ki paidbah, ki rang ialehkai jong ka Kharumnuid FC ki la ialehkai bha tyngeh ban ioh thep kol bad pynphai ia ka shi kol da u Eijingmut Lyngdoh ha ka minit kaba 35.
Ka jingialehkai ka lah kham shongshit bad khluit bha ha kaba ki players jong baroh ar kynhun ki la pyni ia la ki sap bad dei ha ka minit ka ba 40 ba ka Kharumnuid FC ka la ioh ia ka penalty ia kaba lah ioh ban kyrda tyngeh da u goalkeeper jong ka Young Star FC. Haduh ba kut ka kylla step ka jingialehkai ka la kut ha ka jingiakhaid.
Haba bteng ia ka kylla miet, ka Kharumnuid FC ka lah kham ialehkai bha khyndiat bad shim kabu ruh ia ka jing dang long khynnah jong ki rang ialehkai ka Young Star FC bad ka sur ialehkai ki arliang ka la nang kham itynnad shuh shuh. Hapdeng kane ka sur kaba mar ia biang bor bha, ka jingialehkai ka lah kham shongshit bad khluit bha ha kaba ki players jong baroh ar kynhun ki la pyrshang tyngeh bad ialehkai bha ban iohthep kol biang hynrei kim shym la lah ban pynurlong ia ki kabu ba ki lah ioh lad bad tad haduh ba kut ka 90 minit ki la iakhaid 1-1 kol.
Kumta lah rah noh ia ka jingialehkai sha ka extra time ban rai ia ka nongjop hynrei tad haduh ba kut ka por ym shym lah don ba ioh ban pynkhih jar shuh. Lah hap ban pynia shut noh da ka tie-breaker ban rai ia ka nongjop ha kane ka sngi, ha kaba u goal keeper jong ka Young Star FC u lah ioh ban kyrda ia lai ngut ki player shut jong ka Kharumnuid FC kaba la pynlong ia ka Young Star FC ban jop da 3-1 kol bad iohrah ia ka song pisa kaba 70 hajar tyngka ryngkat bad ka trophy ban long ka lahduh jong kane ka tournament mynta u snem.
Phi don ban ong eiei?